Hindistonda O‘zbekistonning investitsiya salohiyati to‘g‘risidagi maxsus nashr tarqatildi
O‘zbekiston Prezidenti Shavkat Mirziyoyevning Hindistonga davlat tashrifi arafasida O‘zbekistonning Dehlidagi elchixonasi tomonidan Business opportunities of Uzbekistan (“O‘zbekistonda biznes yuritish imkoniyatlari”) maxsus nashri tarqatildi. Bu haqda O‘zA xabar bermoqda.
Nashrning o‘n ikki bo‘limida “Nima uchun O‘zbekistonga investitsiya kiritish kerak”, “Mikroiqtisodiy ko‘rsatkichlar va tashqi savdo”, “Infratuzilma”, “Agro-sanoat majmuasi”, “Bozor”, “Eksport imkoniyatlari”, “Biznesni yuritish bo‘yicha Jahon banki reytingida O‘zbekistonning o‘rni”, “Xorijiy investitsiyalarning kafolati va himoyasi”, “Soliq siyosati”, “Xorijiy investorlar uchun imtiyozlar va preferensiyalar” kabi mavzular yoritilgan. Alohida bobda “Angren”, “G‘ijduvon”, “Xazorasp”, “Jizzax”, “Qo‘qon”, “Navoiy”, “Namangan”, “Urgut” hamda farmatsevtika erkin iqtisodiy zonalari va ulardagi istiqbolli yo‘nalishlar to‘g‘risida hikoya qilinadi.
Jurnal O‘zbekistonda biznesni yuritish imkoniyatlarini batafsil tahlil qilish va baholash uchun ko‘plab infografika, jadvallar, reyting va yig‘ma ma’lumotlarni o‘z ichiga olgan. Nashr biznes forumlar, muzokaralar, V2V tadbirlari va taqdimotlarda xorijiy investorlar uchun manzilli tarqatishga mo‘ljallangan.
Bugungi kunda Hindistonda O‘zbekistonda biznes yuritishga qiziqish ortganligi kuzatilmoqda. Dehli va Toshkentda qator biznes forumlar va Savdo-iqtisodiy hamkorlik bo‘yicha ikki tomonlama komissiya majlislari bo‘lib o‘tdi. O‘zbekiston Prezidenti Shavkat Mirziyoyevning davlat tashrifi arafasida o‘tkazilayotgan Hindiston—O‘zbekiston biznes forumi ikki mamlakatning 300 dan ziyod ishbilarmonni jamlaydi, shuningdek, Made in Uzbekistan ko‘rgazmasini namoyish etadi. Biznes forum doirasida iqtisodiyotning yetakchi yo‘nalishlarida yirik investitsiya loyihalarining imzolanishi kutilmoqda.
