Senat raisi: Muammolar yechimi bo‘yicha senatorlar tashabbus ko‘rsatmasa, oddiy odamlar nima qilsin?

Oliy Majlis Senatining o‘n oltinchi yalpi majlisi davom etmoqda. Majlisda Senat raisi Naig‘matilla Yo‘ldoshev ma’ruza qildi, deb xabar beradi O‘zA.

Senat raisi Nig‘matilla Yo‘ldoshev majlis ishtirokchilariga “Muammolarning yechimi bo‘yicha xalq vakili bo‘lgan deputat yoki senator tashabbus ko‘rsatmasa, mas’ul tuzilmalarning yaxshi ma’noda ‘tinchini buzib’, bong urmasa, oddiy odamlar nima ham qilishi mumkin?”, — deya murojaat qildi.

Senat raisi ko‘p bora qayd etilganiga qaramasdan, ayrim senatorlarning tarmoqlar va hududlardagi dolzarb ijtimoiy-iqtisodiy masalalarni hal etish borasidagi tashabbuskorligi sezilmayotganini qattiq tanqid qildi.

“Aksariyat qo‘mitalar a’zolari joriy yilda sohalar va hududlarga xos bo‘lgan muhim masalalarni Senat qo‘mitasi, Kengashi yoki yalpi majlisi muhokamasiga kiritish bo‘yicha tayinli bir taklif bilan chiqmaganini qanday izohlash mumkin?!

Sohalar va hududlardagi dolzarb masalalar yechimini topishda qonun bergan imkoniyat – senatorlik so‘rovidan samarali foydalanilmayapti.

Ayrim qo‘mitalar, ayrim senatorlar joriy yilda o‘zi bevosita vakili hisoblangan hududlardagi dolzarb masalalar yuzasidan mas’ul idoralar va tashkilotlarga biror marta ham senator so‘rovi yubormagan. Ba’zi senatorlar esa nafaqat so‘rov, hatto oddiy murojaat bilan ham birorta idoraga chiqmagan.

Vaholanki, tegishli ishchi guruhlar tomonidan olib borilayotgan o‘rganishlarda birgina Xorazm viloyatining uchta tumanida qariyb 11 mingta, Buxoro viloyatining bitta tumanida 9 mingdan ortiq muammo aniqlangan.

Shu paytgacha mamlakatimiz hududiga, shaharlarimizga kiraverish joylaridagi, shuningdek viloyatlararo o‘tish joylaridagi postlardagi tirbandlik, asossiz o‘rnatilgan to‘xtash belgisi va to‘siqlar birinchi navbatda turistlar, ayni paytda aholining haqli e’tirozlariga sabab bo‘lib kelayotgan edi.

Senat qo‘mitasi tomonidan kiritilgan birgina so‘rov asosida Ichki ishlar vazirligi tomonidan bu boradagi ahvol zudlik bilan qayta ko‘rib chiqildi.

Ma’lumotlarga ko‘ra, Toshkent shahrida bu boradagi kamchiliklar to‘liq bartaraf etildi, joylarda esa tegishli ishlar boshlandi.

Senat qo‘mitalarining Prezident farmon va qarorlari bilan tasdiqlangan davlat hamda hududiy dasturlar ijrosi yuzasidan mas’ul rahbarlarning axborot yoki hisobotlarini eshitib borish bo‘yicha ishlarini ham qoniqarli, deb bo‘lmaydi.

Zotan, joriy yilda birorta qo‘mita bunday axborotlarni eshitish natijalari bo‘yicha Senat Kengashiga birorta jo‘yali taklif va tavsiya bilan murojaat qilmadi.

Shu bois, ko‘pincha yalpi majlislarda vazirlik va idoralar rahbarlarining axborotlarini eshitish bilangina cheklanib qolayapmiz.

Ma’ruzachi vaholanki, bunday amaliyot qo‘mitalarda yil davomida uzluksiz davom etishi zarurligini alohida qayd etdi”, — deyiladi xabarda.