Oliy Majlis Qonunchilik palatasida YeXHT delegatsiyasi a’zolari bilan uchrashuv o‘tkazildi

Shu kunlarda Yevropada xavfsizlik va hamkorlik tashkiloti Parlament assambleyasining Daniya delegatsiyasi O‘zbekistonda bo‘lib turibdi, deb yozadi O‘zA.

O‘zbekiston Respublikasi Oliy Majlisi Qonunchilik palatasida 26-sentabr kuni delegatsiya a’zolari bilan uchrashuv o‘tkazildi.

Mehmonlarga Harakatlar strategiyasi doirasida mamlakatda amalga oshirilayotgan islohotlar, davlat va hududiy dasturlar mazmun-mohiyati, parlament va uning palatalari faoliyati, siyosiy partiyalar, O‘zbekiston Ekologik harakati, fraksiyalar va qo‘mitalarning ish uslublari, xorijiy mamlakatlar parlamentlari bilan hamkorlik bo‘yicha do‘stlik guruhlari haqida ma’lumot berildi. Shuningdek, delegatsiya a’zolari Oliy Majlis huzuridagi Qonunchilik muammolari va parlament tadqiqotlari institutining faoliyati, norma ijodkorligi sohasidagi yangiliklar bilan tanishtirildi.

Uchrashuvda tomonlar bugungi kunda terrorizm, ekstremizm, odam savdosi, giyohvand moddalarning noqonuniy aylanishi kabi global muammolarning oldini olish, ularga qarshi kurashishni muayyan davlat yo xalqaro tashkilotning o‘zi yakka holda uddalay olmasligi, transmilliy jinoyatlarga qarshi birgalikda kurashish muhim samara berishi mumkinligini qayd etdi.

Delegatsiya a’zolari O‘zbekistonning xalqaro va mintaqaviy ahamiyatga ega muhim masalalar bo‘yicha pozitsiyasi bilan qiziqdi. O‘z navbatida, YeXHT tizimidagi hamkorlikdagi loyihalarni amalga oshirish istiqbollari xususida ham so‘z yuritildi. Bugunga qadar O‘zbekiston va YeXHT, xususan uning Parlament assambleyasi o‘rtasida erishilgan kelishuvlarni amalga oshirish, yaqin istiqboldagi ikki tomonlama hamkorlikning muhim yo‘nalishlarini belgilash bo‘yicha fikr almashildi.

Delegatsiya a’zolari shu kuni Inson huquqlari bo‘yicha O‘zbekiston Respublikasi Milliy markazida ham bo‘ldi.