Joriy yilning 21-sentabrida Yaltada III Xalqaro “Yevraziyskiy most” (“Yevroosiyo ko‘prigi”) kinofestivali start oldi.
Bu yilgi badiiy filmlar konkursining hakamlar hay’ati raisi o‘zbekistonlik rejissor Rashid Malikov bo‘ldi.
Bundan tashqari, hakamlar hay’ati tarkibida rossiyalik aktrisa Alyona Babenko va bolgariyalik aktrisa Anya Pencheva ham bor edi.
Festivalni Yevgeniya Shelyakinaning “Aleksandr Xristoforovning boqiy hayoti” filmi ochib berdi. Badiiy filmlar konkurs dasturiga sakkizta kartina – Iliyan Jivelekovning “Har yerda hozir-u nozir”, “Mari Garel Vaysning “Bazm tugadi”, Kim Insonning “Ulg‘ayish”, Vlastimir Sudarning “Yomg‘ir chegaralari”, Siddhartha Jatlaning “Muhabbat va Shukla”, Ventura Ponsning “Miss Dali”, Vera Glagolevaning “Begona emas”, shuningdek, Oksana Karasning “Farishtaning tomog‘i og‘riq” filmlari kirgan.
“Darakchi.uz” Rashid Malikov bilan qisqa intervyu uyushtirdi.
– Boshqa bironta festivalda ham hakamlar hay’atiga raislik qilganmisiz?
–Bu borada ilk tajribam. Bungacha raislik qilmaganman, faqat hakamlar hay’ati a‘zosi bo‘lganman.
– Xalqaro kinofestivalning hakamlar hay’atiga raislik qilishingiz haqidagi xabar sizga qanday ta‘sir qildi?
– Bu men uchun kutilmagan, sharafli va yoqimli xabar bo‘ldi.
– Eng yaxshi filmni tanlashda qanday yo‘l tutasiz?
– Dolzarblik, tomoshabop, siyosiy vaziyat degan tushunchalar bor, “filmning badiiy qiymati” degan tushuncha ham yo‘q emas. Mana shu narsalar shaxsan men uchun tanlovda mezon bo‘ladi.
—Rashid Karimovich, “Sabot” filmingiz katta ekranlarga chiqarilganiga ham allaqachon to‘qqiz oy bo‘ldi. Filmning keyingi taqdiri qanday bo‘ladi?
– Agar kino-teatr prokati haqida gapiradigan bo‘lsak, ahvol havas qilgulik emas. 2017-yilning dekabr oyi oxirlarida premyeradan so‘ng filmni birdaniga ikki “Panorama”da namoyish etishdi va tomoshabinlar kamligini ro‘kach qilishib, filmni darrov prokatdan olib tashlashdi. O‘zbek tomoshabinlari filmni avgustning oxirlarida televizion premyera sharofati bilan “Sevimli” va MY5 telekanallari orqali tomosha qilishdi.
Sentabr oyida Rossiya telekanallari orqali ham “Kultura” telekanalida Kirill Razlogovning “Kult kino” ko‘rsatuvida filmning premyerasi bo‘lib o‘tdi.
Filmning festivalona taqdiri muvaffaqiyatli davom etmoqda. Bugungi kungacha “Sabot” 5 ta xalqaro festivalda qatnashib, 4 ta xalqaro sovrin, jumladan, Gran-prini ham qo‘lga kiritdi. Yil oxirigacha film yana 5 ta festivalga taklif etilgan, kuzda yana ikki premyerasi – Kotbusi shahrida nemischa, Pusanda koreyscha premyerasi bo‘lib o‘tadi. Afsuski, Pusandagi festivalda filmni taqdim etishda shaxsan o‘zim qatnasholmayman – Koreya elchixonasida vizani qo‘lga kiritolmadim.
Elchi bilan uchrashish uchun to‘rt marta urindim, ammo hammasi zoye ketdi. Pusan festivali – Osiyodagi eng yirik festivallardan biridir. O‘xshatish lozim bo‘lsa, festival Osiyo o‘yinlari (sportda) bilan taqqoslash mumkin bo‘lgan obro‘li hodisadir. Film muallifi shunday festivalda qatnashishi mamlakatimizning xalqaro nufuzini ko‘tarishda juda foyda bergan bo‘lardi.
– Kelgusi rejalaringiz haqida so‘zlab bersangiz...
– Hozirda birvarakayiga ikki maydonda kinorejissura va kinodramaturgiya kurslarida mazkur sohaga qiziqqan yoshlarni o‘qitdim. Natijalar meni quvontirdi. O‘zbekistonning maqtasa arzigulik, kino suratga olishga qodir bo‘lgan iqtidorli ijodkor yoshlari bor. Dekabr oyida Bishkekda bo‘lib o‘tadigan qisqa metrajli filmlar fistivaliga hakamlar hay’ati a’zosi sifatida taklif qilindim.
Eng asosiysi esa yangi ssenariy tayyorlayapman. Ilk qoralama allaqachon tayyor bo‘ldi, lekin ssenariy ustida hali ko‘p ishlashim kerak.
– O‘quvchilarimizga tilaklaringiz...
– Chinakam badiiy filmlarni ko‘proq tomosha qiling. Ulardan barcha savollaringizga javob topasiz.
Izoh (0)