“O‘zeltexsanoat” GM Uzbekistan’ga qaraganda ko‘proq imtiyoz talab qilib, undan ham kuchliroq monopolistga aylanishi mumkin. Bunday fikrni iqtisod fanlari doktori, Jahon iqtisodiyoti va diplomatiya universiteti professori Nishonboy Sirojiddinov Facebook’dagi sahifasida bildirib o‘tdi.
“Bizni yana bir “syurpriz” kutayotganga o‘xshaydi. “O‘zeltexsanoat” AK nafaqat proteksionizmni kuchaytirmoqchi, balki xuddi shunday imtiyozlarni qo‘lga kiritib, monopolistga aylanmoqchi”, — deb yozdi ekspert.
“U ko‘proq narsani xohlayapti: tayyor elektrotexnika mahsulotlarini import qilishda umumiy hajmning 60 foizi miqdorida to‘lanadigan bojxona bojlari va aksiz soliqlaridan tushgan mablag‘lar Elektrotexnika sanoatini rivojlantirish jamg‘armasiga yo‘naltirilishi kerak, — deya qayd etdi Sirojiddinov. — Bunday yuzsizlikkacha hatto bizning “sevimli” “O‘zavtosanoat”imiz ham borib yetmagan edi”.
Ekspert GM Uzbekistan’ning samarasiz faoliyatini solishtirish uchun keltirib o‘tdi
“O‘zavtosanoat” AKning 2017-yil uchun biznes-rejasiga ko‘ra, 2017-yil 1-iyun holatiga kompaniya ishchilari soni 25,7 ming kishini tashkil qilgan. 2017-yilda kompaniya 135,5 mingta avtomobil chiqargan.
Agar sohada o‘rtacha ish haqi 300 dollarga teng deb olinsa, kompaniyaning ish haqi jamg‘armasi taxminan 100 million dollarga teng bo‘ladi.
“Tasavvur qilamiz, biz har yili 120 mingta avtomobilni o‘rtacha 8000 dollardan ishlab chiqarmaymiz, balki import qilamiz. Erkin savdoda, ya’ni import tariflari hamda avtomobil importiga aksizlar yo‘q bo‘lgan holatda, yengil avtomobillar importidan QQSdan davlat budjetiga tushadigan mablag‘lar 192 million dollarni tashkil etadi. Yengil avtomobillardan tashqari, boshqa avtomobillarning importi bu miqdorni yanada oshiradi”, — deydi Sirojiddinov.
“Endi, yengil avtomobillar importiga 20 foiz miqdorda stavka bo‘yicha tarif joriy etamiz, natijada ularning import hajmi yiliga 120 ming dona avtomobildan 100 minggacha qisqaradi. Bunday holatda davlat budjetiga faqatgina yengil avtomobillar import tarifi va QQSdan tushum miqdori 352 million dollargacha oshadi”, — deya qo‘shimcha qilib o‘tgan u.
Natijada, olim shunday xulosaga keladi: bizning daromad kamida 252 million dollarga ko‘proq bo‘lishi mumkin edi, yengil avtomobillardan tashqari, boshqa avtomobillar ham ishlab chiqarilishi hisobga olinsa, biz shunchaki davlat budjetidan “O‘zavtosanoat” AK barcha xodimlariga ish haqini ular bu avtomobillarni ishlab chiqarmagani uchun to‘la hajmda kompensatsiya qilib berishimiz mumkin.
Izoh (0)