22-sentabr kuni Andijon mashinasozlik institutida Markaziy Osiyo va MDH a’zo davlatlarida yagona yapon tilidan test imtihonlarini qabul qiluvchi NAT-TEST markazi o‘z faoliyatini boshladi. Bu haqda Andijon mashinasozlik instituti matbuot xizmati xabar bermoqda.
Markazning ochilish marosimiga yaponiyaning NAT-TEST Markazi rahbari Kamata Atsushi ham tashrif buyurdi. Yuksak martabali mehmon markaz va undagi sharoitlar bilan tanishar ekan, yaratilgan sharoit va imkoniyatlarga yuqori baho berdi va hamkorlik qilishdan mamnun ekanligini ta’kidlab o‘tdi.
Kamata Atsushi va Andijon Mashinasozlik instituti rektori U.Salomovlar NAT-TEST Markazini tantanali ravishda ochib berdi. Shundan so‘ng markazning faoliyati, istiqbolli rejalar, yapon tilidan test imtihonlarini qabul qilish jarayonlari bilan bog‘liq bir qator masalalar yuzasidan fikr almashildi.
“O‘zbekiston ulkan imkoniyatlar yurti ekanligiga yana bir bor guvoh bo‘lmoqdaman. O‘rta Osiyoda yagona bo‘lgan bu Markazda, Yapon tilidan test imtihonlarini topshirish uchun barcha sharoitlar mavjud ekanligiga guvoh bo‘ldim. O‘ylaymanki, har tomonlama qulay va samarali bo‘lgan hamkorligimiz uzoq davom etadi. Yuksak darajadagi e’tibor uchun tashakkur deb qolaman”,— deydi Kamata Atsushi.
Izoh (0)