Kobul Beruniyga bag‘ishlangan anjumangan mezbonlik qildi

Afg‘oniston poytaxti Kobulda Abu Rayhon Beruniy hayoti va faoliyatiga bag‘ishlangan xalqaro seminar o‘tkazildi. Unda O‘zbekiston va Hindistondan beruniyshunos olimlar ishtirok etdi. Bu haqda “Xalq so‘zi” xabar bermoqda.

O‘zbekistondan tashrif buyurgan delegatsiyaga professor Ashraf Ahmedov rahbarlik qildi. Shuningdek, O‘zbekiston Fanlar akademiyasi qoshidagi Sharqshunoslik instituti doktoranti Feruza Jumaniyazova va mazkur akademiya tayanch doktoranti Umida Kuranbayeva Beruniy haqidagi maqolalarini taqdim etdi.

Barcha olimlar seminar ishtirokchilari tomonidan qizg‘in kutib olindi. Ayniqsa, O‘zbekistondan tashrif buyurgan beruniyshunoslar shimoliy viloyatlardan borgan, ushbu ilmiy seminarda qatnashgan yoshlar tomonidan xush qarshilandi.

Kobulda Beruniy haqida o‘tkazilgan seminar ikki davlat rahbarlarining Toshkentdagi uchrashuvida kelishilgan mavzulardan biri edi. Ma’lumotlarga ko‘ra, keyingi safar O‘zbekiston tomoni Gavharshodbegim hayoti va faoliyatiga bag‘ishlangan ilmiy anjumanga mezbonlik qiladi.