Navoiy viloyatining Karmana shahri, Islom Karimov ko‘chasida yangi innovatsion loyiha asosida “Xavfsiz piyodalar yo‘lakchasi” qurib bitkazildi. Bu haqda “Xalq so‘zi” xabar bermoqda.
Mazkur hududda harakat xavfsizligini nazorat qiluvchi ko‘p funksiyali “AutocomMTR/uz” apparat-dasturiy kompleksi o‘rnatilib, foydalanishga topshirildi.
Yo‘lakcha sutkaning barcha paytida piyodalar xavfsizligini birdek ta’minlash maqsadida murakkab elektron vositalar bilan jihozlangan.
Xususan, ushbu piyodalar yo‘lakchasiga 50 va 30 metr yetmasdan vibroshovqinli qoplamalar yotqizilgan bo‘lib, ular haydovchinining sergakligini oshirish bilan birga yo‘lakchaga yaqinlashayotganligidan ogoh etadi. Shuningdek, maxsus qurilmalar piyoda yo‘lakka kirishi bilan ishga tushib, o‘ta sezgir detektorlar yordamida yo‘lakka piyoda kirayotganligi to‘g‘risidagi ogohlik signalini harakatlanayotgan piyoda tasviri aks etgan yo‘l belgisiga uzatiladi. Ushbu signal haydovchilarni yo‘lakchada piyoda harakatlanayotganidan ogoh etadi.
“Kelgusida ushbu hududda yo‘l harakati qoidabuzarliklarini fiksatsiya (qayd) qiluvchi 2 ta hamda piyodalar yo‘lakchasidan o‘tayotgan fuqarolarni nazorat qiluvchi 2 ta videokamera o‘rnatiladi. Shu orqali piyodalar xavfsizligini ta’minlash bilan birga yo‘l harakati qoidabuzarliklarining oldi olinadi”, — deydi viloyat IIB YXXB matbuot xizmati rahbari Elmurod Ashurov.
Izoh (0)