1—9-sentabr kunlari Qirg‘izistonning Cho‘lpon ota shahrida Butunjahon ko‘chmanchi xalqlar o‘yinlari bo‘lib o‘tmoqda. Bu haqda O‘zA xabar berdi.
O‘zbekiston Jismoniy tarbiya va sport vazirligi matbuot xizmati ma’lum qilishicha, Jismoniy tarbiya va sport vaziri Dilmurod Nabiyev rahbarligidagi O‘zbekiston sport delegatsiyasi xalqlar o‘yinlarda ishtirok etish uchun Qirg‘izistonga jo‘nab ketgan.
O‘zbekiston sport delegatsiyasi jami 76 kishidan iborat, shundan 13 ta(kurash, sambo, gushtini milli kamarbandi (Tojikiston kurashi), qozoq kurashi bo‘yicha, paxlavani (Eron kurashi), gyulesh (Ozarbayjon kurashi), ashirtmali aba gyuleshi (Turkiya kurashi), alish kurashi (Qirg‘iziston kurashi), goresh (Turkmaniston kurashi), mangol box (Mo‘g‘uliston kurashi), qirg‘iz kurashi, armrestling, lochin ovi va tayganlar yugurishi bo‘yicha) sport turidan 54 nafar sportchi, 15 nafar murabbiy va 7 nafar menejer, mutaxassis, ishchi guruhi a’zolari va rahbari ishtirok etmoqda.
O‘yinlarda 50 ta sport turi bo‘yicha 500 dan ortiq komplekt medal jamlanmasi o‘ynaladi. Ushbu o‘yinlarda O‘zbekiston sport delegatsiyasi ilk bor ishtirok etmoqda.
Mazkur o‘yinlarni o‘tkazishdan asosiy maqsad milliy sport turlarini asrash, xalqlar o‘rtasida do‘stlik aloqalarini yanada mustahkamlashdir.
2-sentabr kuni “Bir ruhda — kuch birlikda” shiori ostida o‘yinlarning tantanali ochilish marosimi o‘tkazilib, unda dunyoning 66 ta davlatidan tashrif buyurgan 1556 nafar sportchi ishtirok etdi.
III Butunjahon ko‘chmanchi xalqlar o‘yinlari ochilish marosimida ishtirokchilarini Qirg‘iziston Respublikasi Prezidenti Sooranbay Jeenbekov qutladi. Tadbirda Qozog‘iston, Turkiya, Tatariston Respublikalari Prezidentlari, Birlashgan Arab Amirliklarining Fujayra amirligi shahzodasi, Vengriya Bosh vaziri mehmon sifatida ishtirok etishdi.
O‘zbekiston vakillar alish kurashi (Qirg‘iziston kurashi), Armrestling sport turlari bo‘yicha bahslarga kirishdi. O‘yinlardagi dastlabki yutuqlar qo‘lga kiritildi, armrestling bo‘yicha chap qo‘l bahslarida 18 davlatdan tashrif buyurgan 72 nafar ishtirokchi orasida Dmitriy Dokuchayev (75 kg.), Qudratillo Niyazi (95 kg.), Firdavs Gafurov (105 kg.) musobaqaning bronza medalini qo‘lga kiritdi.
Izoh (0)