Bugun, 1-sentabr sanasida Indoneziyaning Jakarta hamda Palembang shahrida XVIII yozgi Osiyo o‘yinlarining boks musobaqalarida final bahslari bo‘lib o‘tmoqda.
Hozirgina -56 kg vaznda O‘zbekiston sharafini himoya qilgan Mirazizbek Mirzahalilov final jangini o‘tkazdi. Unga hal qiluvchi jangda Shimoliy koreyalik Xyo Nam Jo raqiblik qildi. Koreyalik bokschi jarohati sabab jangni so‘ngiga qadar davom ettira olmadi. Miraziz esa Osiyo o‘yinlari—2018 chempioniga aylandi.
Bu g‘alaba tufayli Mirazizbek O‘zbekistonga 17-oltin medalni keltirdi. Biroz avval -49 kg vaznda Hasanboy Do‘stmatov kumush, -52 kg vazndagi Jasurbek Latipov esa oltin medalga ega chiqqani haqida xabar berilgandi. Bugun, shuningdek, yana 4 nafar bokschi final jangida ishtirok etadi.
- -60kg: Shunqor Abdurasulov- Tsendbaatar Yerdenebat (Mo‘g‘uliston)
- -64kg: Iqboljon Xoldorov- Chinzorig Baatarsux (Mo‘g‘uliston)
- -69kg: Bobousmon Baturov- Aslanbek Shimbergenov (Qozog‘iston)
- -75kg: Isroil Madrimov- Abilxan Amankul (Qozog‘iston)
Izoh (0)