Osiyo o‘yinlari—2018. O‘zbekistonlik uch nafar kurashchi final yo‘llanmasi uchun gilamga chiqadi

Bugun, 30-avgust sanasida Indoneziyaning Jakarta hamda Palembang shaharlarida XVIII yozgi Osiyo o‘yinlari davom etmoqda.

O‘zbek milliy kurashi bo‘yicha o‘tkazilayotgan bahslar ham qizg‘in pallasiga kirib bormoqda. Jumladan, bugun yana 4 nafar o‘zbekistonlik kurashchi bahslarga kirishdi.

-78 kg vaznda gilamga chiqqan Dilroza Bozorova qozog‘istonlik Gulibonu Amanxonovaga qarshi bahsda mag‘lub bo‘ldi.

Mazkur vazn toifasidagi o‘zbekistonlik yana bir kurashchi Kumush Yo‘ldosheva esa yarim finalga chiqdi. U chorak finalda qozog‘istonlik Kaljan Tayjanovadan ustun keldi. Kumush endi final yo‘llanmasi uchun Xitoy Taypeyidan bo‘lgan Yang Xsieyenszuga qarshi kurash olib boradi.

-90 kg vazn toifasida gilamga chiqayotgan Yahyo Imomov final yo‘llanmasi uchun qozog‘istonlik Yersulton Muzapparovga qarshi kurashadi. U chorak finalda turkmanistonlik Guvanch Begaliyevni mag‘lub etdi.

Shu vazndagi yana bir O‘zbeiston vakili Shermuhammad Jandriyev ham yarim finalga chiqdi. U chorak finalda afg‘onistonlik Shirzad Aziziydan ustun keldi. Endi Shermuhammad final yo‘llanmasi uchun iordaniyalik Husayn Misriyga qarshi gilamga chiqadi.