Kurash. Oltin Shermuhammadga, kumush esa Yahyoga. O‘zbekistonning oltinlari 15 taga yetdi

Bugun, 30-avgust sanasida Indoneziyaning Jakarta hamda Palembang shaharlarida XVIII yozgi Osiyo o‘yinlari davom etmoqda.

O‘zbek kurashi bo‘yicha -90 kg vazn toifasidagi final bahsida ikki o‘zbekistonlik kurashchi — Yahyo Imomov va Shermuhammad Jandriyev o‘zaro bellashishi haqida avvalroq xabar berilgandi.

Final bahsida Shermuhammad Yahyoni kichik ustunlik bilan mag‘lub etib, O‘zbekiston hisobiga 15-oltin medalni taqdim etdi. Yahyo esa 19-kumush medalni delegatsiya hisobiga yozib qo‘ydi. Bu orqali delegatsiya medallari soni 52 taga yetdi.

Shu tariqa O‘zbekistonning oltin jamg‘arish bo‘yicha Pusan—2002 musobaqalaridagi eng yaxshi — 15 ta oltin natijasi takrorlandi. Endi u katta ehtimol bilan yangilanishda davom etadi.

Ma’lumot uchun, yarim finalda Imomov final yo‘llanmasi uchun qozog‘istonlik Yersulton Muzapparovga qarshi bahsda g‘olib bo‘lib, finalga chiqqandi. Jandriyev esa yarim finalda iordaniyalik Husayn Misriyga qarshi gilamga chiqib, g‘alabaga erishgan holda finalga yo‘l olgandi.