2013-yilgi Boston marafonidagi portlashlar tashkilotchilaridan biri, AQShda o‘limga mahkum etilgan Joxar Sarnayevning do‘sti — qozog‘istonlik 24 yoshli Dias Qodirboyev o‘z jazo muddatini o‘tab bo‘ldi, deb yozadi “TASS”. U vatani Qozog‘istonga deportatsiya qilinishi uchun immigratsiya ma’murlari qo‘liga berildi.
Yigit qamoq muddatini Texas shtatining Big-Spring shahridagi federal qamoqxonada o‘tagan.
AQShda tahsil olgan Qodirboyev Sarnayev bilan tanish bo‘lgan. U va yana bir qozog‘istonlik talaba — Azamat Tajayakov teraktdan uch kun o‘tib, yangiliklar dasturida Joxar Sarnayev va akasi Tamerlan Sarnayevning suratlarini ko‘rgach, do‘stiga tegishli bo‘lgan hamda ichida noutbuk va pirotexnika bo‘lgan ryukzakni tashlab yuborgan, bu esa teraktni tekshirish ishlarini ancha qiyinlashtirgan.
Qodirboyev 2014-yil avgustida o‘z aybiga iqror bo‘ldi, 2015-yilda teraktni tekshirishga to‘sqinlik qilish ayblovi bilan 6 yilga qamaldi.
Eslatib o‘tamiz, 2013-yil 15-aprel kuni Bostondagi marafon chog‘ida portlash oqibatida uch kishi halok bo‘lgan. Teraktni sodir etganlikda ayblangan Tamerlan Sarnayev politsiyachilar tomonidan otib o‘ldirilgan, ukasi Joxar esa qo‘lga olingan edi. 2015-yil iyunida Joxar Sarnayevga rasman o‘lim jazosi hukmi e’lon qilindi.
Izoh (0)