Toshkent shahar davlat soliq boshqarmasi tomonidan “Soliq xizmati - yosh tadbirkorlarning ishonchli hamkori” mavzusida yoshlar bilan uchrashuv o‘tkazildi. Bu haqda Toshkent shahar davlat soliq boshqarmasi jamoatchilik bilan aloqalar va huquqiy axborot bo‘limi xabar bermoqda.
O‘zbekiston Respublikasi Prezidentining “Yoshlar-kelajagimiz” “Davlat dasturi to‘g‘risida”gi farmoni ijrosi yuzasidan o‘tkazilgan tadbirda tuman davlat soliq inspeksiyalari rahbarlari, Markaziy bank Toshkent shahar boshqarmasi vakillari, yurtimizda ko‘zga ko‘ringan tadbirkorlar hamda yoshlar ishtirok etdi.
Tadbirda Toshkent shahar davlat soliq boshqarmasi boshlig‘i bugungi kunda soliq idoralari o‘z faoliyatlarini yangi bosqichda amalga oshirayotgani, ushbu tadbirdan ko‘zlangan asosiy maqsad, tadbirkorlik faoliyatini boshlagan va boshlamoqchi bo‘lgan yosh tadbirkorlarning muammolarini eshitish, ularga amaliy yordam ko‘rsatish hamda kelgusida soliq xizmati — yosh tadbirkorlarning ishonchli hamkori bo‘lib ishlashini ta‘minlashdan iborat ekanligini alohida ta‘kidladi.
Uchrashuvda yosh tadbirkorlarga berilgan soliq imtiyozlari, yengilliklari ularga yaratilayotgan shart-sharoit hamda imkoniyatlar haqida batafsil ma‘lumot berildi.
Qayd etilganidek, ayni paytda poytaxtda 10 ming nafarga yaqin yosh ishbilarmon va 720 nafar hunarmand o‘z tadbirkorligini yo‘lga qo‘ygan. Kasb-hunar kollejlarini tamomlab, yakka tartibdagi tadbirkor sifatida davlat ro‘yxatidan o‘tgan 1136 nafar yoshlar qat’iy belgilangan soliq bo‘yicha jami 2,8 milliard so‘mlik soliq imtiyozlaridan foydalangan.
Ochiq muloqot tarzida o‘tgan tadbirda ko‘zga ko‘ringan tadbirkorlar Korzinka.uz supermarketlar tarmog‘i asoschisi Zafar Hoshimov hamda “Ofiss market” rahbari Husan Mamasaidov o‘zlarining hayotiy tajribalariga oid fikr-mulohazalari, tavsiya va ko‘rsatmalari bilan o‘rtoqlashdi. Bu esa, yosh tadbirkorlar uchun o‘ziga xos mahorat darsi bo‘ldi.
Uchrashuvda yosh tadbirkorlar o‘zlarining biznes rejalarini yig‘ilganlarga namoyish etdi. Bundan tashqari, yoshlar tomonidan o‘z biznes rejalarini amalga oshirish va faoliyatini kengaytirish uchun banklardan imtiyozli kreditlar olish, tadbirkorlikni boshlash uchun joy ajratilishi hamda boshqa muammoli masalalar o‘rtaga tashlandi.
Tadbir davomida yoshlar oldida turgan to‘siqlar o‘rganib chiqilgan holda Toshkent shahar davlat soliq boshqarmasi boshlig‘i hamda har bir hududiy davlat soliq inspeksiyalari rahbarlariga tadbirkorlik faoliyatini boshlagan va boshlamoqchi bo‘lgan 10 nafardan yoshlar biriktirildi.
Soliq xizmati organlari rahbarlari o‘zlariga biriktirilgan yoshlarning tadbirkorlik faoliyatidagi ilk qadamlaridan boshlab, toki yuksak darajaga yetguniga qadar barcha muammolarini hal etib, ularning ishonchli hamkori bo‘lib qoladi.
Izoh (0)