Bir yil davomida sudma-sud yugurgan tadbirkor Nadejda Mirzayeva oxiri adolat tantanasiga erishib, sud uning foydasiga qaror chiqardi. U endi noqonuniy tortib olingan yer uchastkasi o‘ziga qaytarilishiga ishongan edi. Ammo 3 oydan oshibdiki, sud qarori bajarilmay kelinmoqda. Bu haqda “Daryo”ga samarqandlik jurnalist Toshpo‘lat Rahmatullayev xabar bermoqda.
Nadejda Mirzayeva Samarqand viloyatining Narpay tumanida “Omonqul Mirza” va “Nadejda trans servis” mas’uliyati cheklangan jamiyatlari ta’sischisi bo‘lib, avtomobil transportida yo‘lovchi tashish bilan shug‘ullanadi. Bir yildan ortiqroq vaqt davomida u o‘z ishini bajarolmasdan, adolat istab, tashkilotma-tashkilot yurishga majbur bo‘lmoqda.
2017-yil may oyida “Samarqandtrans markazi”ga qarashli “Samarqand Rudakiy” sho‘ba korxonasiga Mirbozor chorrahasida avtoshohbekat qurilishi uchun Narpay tuman hokimining qarori bilan 0,89 gektar yer maydoni ajratilib, qurilish ishlari boshlab yuborilgan edi. Yangi obyektni deb chorrahada joylashgan muzey binosi, xotira maydoni va ona haykali buzib tashlandi va ajratilgan 0,89 gektar yer maydoni o‘rniga 1,30 gektar yer egallab olindi.
Tadbirkor Nadejda Mirzayeva ta’sischisi bo‘lgan ““Omonqul Mirza”ga tegishli 0,513 gektar yer maydonini ham “Samarqand Rudakiy” ShK o‘zboshimchalik bilan egallab oladi. Shundan so‘ng tadbirkor prokuratura va iqtisodiy sudga murojaat qiladi. Sud noqonuniy egallab olingan yer maydonini egasiga qaytarish to‘g‘risida qarori chiqaradi.
“2018-yil 14-mayda sud qarorini bajarish maqsadida ijro varaqasini MIB Narpay tuman bo‘limiga topshirdim. Qonunchilikda sud qarorini ijro qilish uchun ikki oylik muddat belgilangan, ammo uch oydan ko‘proq vaqt o‘tishigi qaramasdan, sud qarorini bajarish paysalga solib kelinmoqda”, — deydi N.Mirzayeva.
Na MIB, na Narpay tuman hokimligidan amaliy madad ololmagan tadbirkor adolat izlab Samarqand viloyati hokimi vazifasini bajaruvchi Erkinjon Turdimov qabuliga kiradi. Hokim muammo bilan tanishgach, o‘sha zahoti tegishli tashkilot rahbarlariga uni zudlik bilan qonun doirasida hal etishga ko‘rsatma beradi.
O‘shandan keyin ham bir oy vaqt o‘tdi. N.Mirzayevaning har kunlik yugur-yuguri oqibatida unga bir necha marta aniq kunini belgilab, o‘sha kuni tegishli tashkilot vakillari ishtirokida o‘rtadagi devor buzilib, unga qarashli bo‘lgan yer maydoni qaytarib berilishi ma’lum qilindi. Belgilangan joyga tadbirkor, ayrim paytlar tez yordam xodimlari va yong‘in o‘chiruvchilar kelib, kutishdi. Ammo mutasaddi tashkilotlar vakillaridan darak bo‘lmadi. Qisqasi, Narpay tuman Majburiy ijro byurosi turli bahonalar bilan sud qarorini bajarishni paysalga solib kelmoqda.
Nima uchun qonun talablarini mensimasdan, qonun posbonlari sud qarorini bajarishni paysalga solib, “Samarqand Rudakiy” ShKning tomonida turishibdi, degan haqli savol tug‘iladi. Buning sababini Nadejda Mirzayeva quyidagicha izohlaydi:
— Ushbu korxona “O‘zavtodaryotrans” agentligi Samarqand viloyat hududiy bo‘limining sho‘ba korxonasi bo‘lib, uning rahbari asli Narpay tumanidan bo‘lgan Inatilla Xamrayevdir. Ko‘p yillardan beri ushbu vazifani egallab yurgan rahbarning gapi qonun talabidan ham ustunlik qilmoqda.
N.Mirzayevaning “qaysarligi”, ya’ni qudratli korxonani sudga berib, uni o‘ziga tegishli yer maydonidan chiqarishga erishganligi tadbirkor va uning mehnat jamoasi uchun ayanchli oqibatga olib keldi.
— I.Xamrayev tomonidan menga yerdan voz kechish to‘g‘risida takliflar bo‘ldi. “Yeringdan voz kechsang, firmalaring ishlaydi, rozi bo‘lmasang seni ishlashga qo‘ymayman” deb, har xil vositalar bilan tadbirkorlik faoliyatimni bo‘g‘ish harakatiga tushdi. Unga qo‘shilgan Narpay tuman hokimligining amaldorlari tomonidan men va xodimlarim ta’qib ostiga olindik.
N.Mirzayevaning uqtirishicha, ayni paytda “O‘zavtodaryotrans” agentligi unga tegishli bo‘lgan “Omonqul Mirza” va “Nadejda trans servis” MChJlarning yo‘lovchi tashishga ruxsat beruvchi litsenziyalarini bekor qilish, korxonalarga a’zo bo‘lgan taksi haydovchilariga litsenziya varaqalarini bermaslik, yunalishda qatnashish uchun o‘tkazilayotgan tenderga chaqirmaslikka harakat qilmoqda.
— “Kattakon”ning bir og‘iz “suddan arizangni chaqirib ol” degan taklifini qabul qilmaganligim uchun meni bankrot qilib, mulkimni yo‘q qilib, tavbamga tayantirmoqchi bo‘lishyapti, – deydi tadbirkor opa. Uning so‘zlariga qaraganda, sudni yuta olmasligini anglagan agentlik boshlig‘i tuman hokimligi bilan hamkorlikda harakat qilishga o‘tib oldi.
Narpay tuman hokimining jamiyatga shohbekat binosiga egalik xuquqini beruvchi 2005-yil 11-apreldagi qarori shu tuman xokimining 2017-yil 23-oktabrdagi qarori bilan bekor qilindi. Vaholanki, mavjud qonunchiligimiz bo‘yicha hokimga o‘z qarorini bekor qilish xuquqi berilmagan. Bu esa amaldorlarning tadbirkorga bosim o‘tkazish, uni ta’qib ostiga olishga urinishning namunasi emasmi? Odil sud ushbu masalaga qonuniy yondashdi. Samarqand viloyat iqtisodiy sudining 2018-yil 18-yanvardagi qarori bilan Narpay tuman hokimining 2017-yildagi qarori haqiqiy emas deb topildi.
Hozirda jamiyatga qarashli 60ga yaqin avtotransport vositasi yo‘nalishga chiqmay qo‘ydi. Natijada 70 ta ish o‘rini qisqarib, xuddi shu miqdordagi oila tirikchilik manbaisiz qoldi. Achinarlisi shundaki, agentlik tomonidan litsenziya shartlari bajarilishi talab qilinmoqda, lekin tadbirkor ayolning shartlar bajarilganligi to‘g‘risidagi xatlari umuman e’tiborsiz, murojaatlari javobsiz qolmoqda.
Hammasi borib sud qarori bilan N.Mirzayevaga egalik huquqi belgilangan 513 kvadrat metr yerga borib taqalmoda. “Amaldorlar ana shu yer maydonidan voz kechishimni talab qilib, ularning noqonuniy shartiga rozi bo‘lgan taqdirimda jamiyat faoliyatini tiklashga, litsenziyalarimizni qaytarib berishga va’da qilishmoqda. Agentlik boshlig‘ining bu harakati tadbirkorlikka to‘sqinlik qilish emasmi?”, — deydi o‘kinch bilan N.Mirzayeva.
Nadejda Mirzayeva Samarqandda adolat va haqiqat tomon qo‘yilayotgan qadamlar, o‘zgarib borayotgan siyosat uning ishiga ham ijobiy ta’sir ko‘rsatadi, deb umid bildirmoqda.
Izoh (0)