Rossiya IIV jinoyatlarni fosh qilishda yordam bergan fuqarolarga mukofot puli to‘laydi

Rossiya adliya vazirligi mamlakat ichki ishlar vazirligi tomonidan ishlab chiqilgan, politsiyaga jinoyatlarni fosh qilishda yordam bergan fuqarolarni moddiy rag‘batlantirish haqidagi buyruqni tasdiqladi, deb yozadi “RBK”.

Hujjatga ko‘ra, jinoyatni fosh qilish yoki jinoyatchini tutishda hamkorlik qilishni so‘rab aholiga murojaat qilish uchun, IIV organi bo‘linmasi moliyaviy-iqtisodiy siyosat va ijtimoiy kafolatlar ta’minoti bo‘yicha departamentga murojaat qilishi kerak. Agar tashabbus qo‘llab-quvvatlansa, mukofot puli ko‘rsatilgan ma’lumot IIV saytida va OAVlarda e’lon qilinishi kerak. 500 ming rublgacha bo‘lgan to‘lovlar hududiy darajada, 3 million rublgacha bo‘lgan mukofot pullari esa IIV rahbarining birinchi o‘rinbosari tomonidan tasdiqlanadi, katta summalarni to‘lash haqidagi qarorni IIV rahbari Vladimir Kolokolsev qabul qiladi.

Moliyaviy-iqtisodiy siyosat va ijtimoiy kafolatlar ta’minoti bo‘yicha departament kelishilgan summani IIV hududiy organiga ko‘chirib o‘tkazadi. Buyruq chiqarilgach, informatorga mukofot to‘lanishi haqida ikki hafta ichida xabar berilishi kerak. Rag‘batlantirish rad etilgan taqdirda, IIV bu haqda qaror qabul qilinganidan keyin yetti kun ichida xabar berishi kerak.