Bugun,

  • USD 11095.31
  • RUB 173.84
  • EUR 10772.44

Ichki ishlar vaziri, general-mayor Po‘lat Bobojonov rahbarligidagi ishchi guruh joriy yilning 12—16-avgust kunlari Xorazm viloyatining barcha shahar va tuman ichki ishlar organlari hamda viloyat ichki ishlar boshqarmasida batafsil o‘rganishlar olib borib, ularning yakuni bo‘yicha har bir tarkibiy tuzilma va xodimlar faoliyatiga tanqidiy baho berdi. Bu haqda IIV jamoatchilik va OAV bilan aloqalar boshqarmasi xabar berdi.

Foto: IIV jamoatchilik va OAV bilan aloqalar boshqarmasi

Foto: IIV jamoatchilik va OAV bilan aloqalar boshqarmasi

O‘rganishlar davomida Ichki ishlar vaziri Xazorasp, Bog‘ot, Yangiariq, Xonqa, Urganch tumanlarida ichki ishlar organlari shaxsiy tarkibi bilan uchrashdi. “Xavfsiz shahar” konsepsiyasi asosida Urganch shahrida o‘rnatilayotgan videokuzatuv moslamalarining ishlash jarayonlari bilan tanishdi. Ichki ishlar vazirligiga qarashli Xorazm akademik litseyida ta’lim olish jarayonlari uchun sharoitlarni yaxshilash maqsadida, litseyga zamonaviy sport anjomlari sovg‘a qilindi hamda litsey kutubxonasini badiiy adabiyotlar bilan boyitish bo‘yicha topshiriqlar berildi.

O‘rganishlar yakuni bo‘yicha Prezident devoni, Bosh prokuratura, viloyat hokimligi va ichki ishlar organlari mas’ul xodimlari ishtirokida yig‘ilish bo‘lib o‘tdi. Unda joriy yilning o‘tgan davri mobaynida Xorazm viloyatida jinoyatchilikning oldini olish borasida amalga oshirilgan chora-tadbirlar natijasida umumiy jinoyatlar 781 taga yoki 41,4 foizga, jinoyat qidiruv sohasidagi jinoyatlar 434 taga yoki 41,1 foizga kamayganligi qayd etildi.

O‘z navbatida, viloyatning ayrim ichki ishlar organlari xodimlarining fuqarolar bilan munosabatlarda noo‘rin hatti-harakatlari, rahbarlarning mas’uliyatsizligi va beparvoligi hamda ularning qo‘l ostidagi xodimlari ustidan kunlik nazoratni lozim darajada olib borilmayotganligi oqibatida yo‘l qo‘yilgan kamchiliklar aholining haqli e’tiroziga sabab bo‘layotganligi ko‘rsatib o‘tildi.

Respublikaning boshqa hududlarida bo‘lgani kabi Xorazm viloyatida ham jinoyatchilikning tub ildiziga to‘liq yetib borilmayotganligi, jinoyatlarning asl sabablari o‘rganilmasdan, mahalla, mehnat jamoalari va ta’lim muassasalaridagi muhokamalar nomiga tashkil qilinib, rasmiyatchilik bilan o‘tkazilishiga yo‘l qo‘yilayotganligi tanqid qilindi.

Foto: IIV jamoatchilik va OAV bilan aloqalar boshqarmasi

Foto: IIV jamoatchilik va OAV bilan aloqalar boshqarmasi

Xususan, viloyatda joriy yilning 7 oyi mobaynida jinoyatchilik kamayganiga qaramasdan, ayrim hududlarda kriminogen vaziyat birmuncha og‘irlashgan. Shovot va Yangiariq tumanlarida qotillik, Xonka, Urganch va Qo‘shko‘pir tumanlarida og‘ir shikast yetkazish jinoyatlari ko‘paygan.

Mahallalarda fuqarolar o‘rtasidagi o‘zaro kelishmovchiliklar va ularni o‘z vaqtida bartaraf etish choralari ko‘rilishiga jiddiy va mas’uliyatli yondashilmayotganligi oqibatida joriy yilning 7 oyi mobaynida 3 ta qotillik va 17 ta tan jarohati yetkazish jinoyatlari oila-turmush munosabatlari doirasida sodir etilgan.

Shovot, Gurlan, Xazorasp, Qo‘shko‘pir tumanlari va Xiva shahrida iyun va iyul oyilarining o‘zida jinoyat qidiruv yo‘nalishi bo‘yicha sodir etilgan jinoyatlar soni keskin oshgan. Urganch shahrida jinoyatlarning 77 tasi ko‘chalarda, 69 tasi esa qo‘riqlashga olinishi lozim bo‘lgan obyektlarda sodir etilganligi qayd etilib, jamoat tartibini saqlash va qo‘riqlash sohasidagi chora-tadbirlarni kuchaytirish bo‘yicha topshiriqlar berildi.

Muhokamalar davomida egallab turgan lavozimiga noloyiq xatti-harakatlarni sodir etgan, sohada amalga oshirilayotgan islohotlarning mazmun-mohiyatini to‘laqonli anglab yetmasdan, bugungi kun talablariga javob bermaydigan eskicha ish uslubida xizmat qilayotgan, o‘z ustida ishlamasdan, fuqarolarning manfaati yo‘lida jonbozlik ko‘rsatmagan Yangibozor tumani IIB boshlig‘i vazifasini bajaruvchi J.Piryazov, IIB boshlig‘ining yoshlar masalalari bo‘yicha o‘rinbosari Yu.Axmedov, Jinoyat qidiruv bo‘linmasi boshlig‘i I.Salayev, Urganch tumani IIB boshlig‘ining yoshlar masalalari bo‘yicha o‘rinbosari Sh.Jumanazarov, Qo‘shko‘pir tumani IIB boshlig‘ining birinchi o‘rinbosari Sh.Hasanov, Yangiariq tumani IIB boshlig‘ining xizmat bo‘yicha o‘rinbosari X.Nurmetov egallab turgan lavozimlaridan ozod etildi.

Shuningdek, faoliyatida yo‘l qo‘ygan kamchiliklar, xizmat vazifalarini bajarishga mas’uliyat bilan yondashmagan qator rahbar va xodimlarga turli darajadagi intizomiy jazo choralari qo‘llanildi.

Izoh
Asosiy yangiliklar
Mahalliy
Virtual kartalar nima va ulardan qanday qilib to‘g‘ri foydalanish mumkin?
Dunyo
Twitter ofisida xodimlar uchun karavotlar paydo bo‘ldi, Ilon Mask avvalroq me’yoridan ortiqcha ish bo‘lishi haqida ogohlantirgandi
Mahalliy
Xorazmda ikki kishi is gazidan vafot etdi