Foreign Policy jurnali 2010-yillar boshida AQSh Markaziy razvedka boshqarmasining Xitoydagi eng yirik muvaffaqiyatsizliklaridan biri haqida yangi ma’lumot e’lon qildi, deb yozadi Rambler News.
Nashr MRBning besh nafar hozirgi va sobiq xodimlariga tayanib ma’lum qilishicha, xitoyliklar MRB agentlari o‘z manbalari bilan aloqa uchun ishlatgan aloqa tizimini fosh qilib, so‘ng ushbu axborotni Rossiyaga uzatgan.
MRB aloqa tizimi buzib kirilgach, Xitoy kontrrazvedkasi Xitoydagi amerikalik agentlarni yoppasiga hibsga olishni boshladi. Nashr manbalaridan birining xabariga ko‘ra, 30 ga yaqin kishi qo‘lga olingan va o‘ldirilgan. 2017-yilda New York Times gap o‘ndan ortiq o‘ldirilgan agentlar haqida borayotganini yozgan edi.
Ushbu ishni tekshirish bilan MRB va FQB xodimlaridan iborat maxsus guruh shug‘ullangan. Natijada MRB sobiq ofitseri Jerri Chun Shin Li qo‘lga olingan, unga Xitoy tomoni bir necha yuz ming dollar to‘lagan. Virjiniya sudi shu yilning mayida uni razvedka ma’lumotlarini Xitoy hukumatiga berganlikda aybladi.
Bundan tashqari, xitoylik kiberekspertlar MRB xodimlarining o‘z manbalari bilan muloqot qilishi uchun mo‘ljallangan ikkita onlayn dasturni shifrdan chiqarishga muvaffaq bo‘ldi.
Manbalardan biri ta’kidlashicha, MRBda Xitoy o‘z topilmalarini Rossiya bilan bo‘lishgan deb o‘ylash uchun jiddiy asoslar bor, amerikaliklar Rossiyada ham yashirincha aloqa uchun shunga o‘xshash tizimlardan foydalangan.
Boshqarmaning Rossiyadagi bir nechta manbalari MRBning Xitoydagi aloqa tizimi fosh qilingan vaqtda, birdan aloqaga chiqmay qo‘ygan.
Izoh (0)