So‘nggi mish-mishlarga ko‘ra, Samsung’ning ilk buklama smartfoni yanvarda CES 2019 ko‘rgazmasida taqdim etiladi, deb yozadi Hi-Tech Mail.Ru. Internetda qurilmaning Samsung’ning bir nechta patent arizalari asosida chizilgan ilk tasvirlari paydo bo‘ldi.
Avvalroq smartfon Galaxy X deb nomlanishi taxmin qilingan edi, ammo so‘nggi ma’lumotlarga ko‘ra, u Galaxy F deb atalishi mumkin (foldable — “buklanadigan” so‘zidan olingan). Renderlarga qaraganda, qurilmani buklab, to‘liq yopib bo‘lmaydi. Bundan tashqari, ekranlardan biri ikkinchisini to‘liq to‘smaydi, shu sababli pastda bildirishnomalarni ko‘rsatish yoki multimediani boshqarish tugmalarini aks ettirish uchun kichik joy qoladi.
Renderlar mualliflari barmoq izi skanerini qurilmaning orqa paneliga joylashtirdi, biroq Samsung uni displey tagiga ham o‘rnatishi mumkin. Qurilmada to‘rtta kamera bo‘ladi, ikkitasi old, ikkitasi orqa panelda joylashadi.
Mish-mishlarga muvofiq, ochiq holatda Galaxy F’da 7 dyuymli va 1440×3360 pikselli ekran, 3000 dan 6000 Ma/soatgacha sig‘imli batareya bo‘ladi. Narxi 1850 dollar bo‘lishi taxmin etilmoqda.
Izoh (0)