Samarqandda qo‘shmachilik bilan shug‘ullangan yigitlarga hukm o‘qildi

Jinoyat ishlari bo‘yicha Samarqand shahar sudi tomonidan Samarqand shahridagi “Mehrobod” mahalla fuqarolar yig‘inida sayyor sud o‘tkazildi. Huquq tartibot idoralari vakillari hamda mahalla fuqarolari ishtirokida o‘tkazilgan sayyor sudda qo‘shmachilik bilan shug‘ullanib kelgan ikki fuqaroning jinoiy ishi ko‘rib chiqildi. Bu haqida “Daryo” muxbiri Farhod Norbo‘tayev xabar bermoqda.

Samarqand shahrining “Mehrobod” va “Bek” mahalla fuqarolar yig‘inida yashovchi Akmal va Rasul Shukurovlar qo‘shmachilik bilan shug‘ullanib kelgan. O‘zaro til biriktirgan holda jinoyatini amalga oshirib kelgan bu ikki shaxs Samarqand shahrining Beruniy ko‘chasida joylashgan ko‘pqavatli uylardan ijaraga uy olib, fohishaxona tashkil qilishgan.

Ular axloqsiz niyatlarini amalga oshirmoqchi bo‘lgan kimsalarni pul evaziga ushbu xonadonga qabul qilib turishgan. Ammo joriy yilning 11-may kuni Samarqand shahar Ichki ishlar boshqarmasi tezkor xodimlari tomonidan o‘tkazilgan tadbir davomida qo‘shmachilik ishini sodir qilib kelayotgan Akmal va Rasul Shukurovlar jinoyat ustida qo‘lga olingan. Mazkur tadbir davomida ular tomonidan qilmishi evaziga olingan 110 ming so‘m miqdoridagi pullar xolislar ishtirokida ashyoviy dalil sifatida hujjatlashtirilgan.

Jinoyat ishlari bo‘yicha Samarqand shahar sudyasi Furqat Rahmonov raisligida o‘tkazilgan sayyor sud jarayonida Akmal va Rasul Shukurovlarning jinoyatga qo‘l urishiga oilasi va mahalla jamoatchiligining beparvoligi, loqaydligi sabab bo‘lganligi ta’kidlandi. Unda so‘z olgan mahalla oqsoqollari kelgusida ularni o‘z yo‘llarini topishi, tarbiyali va namunali yoshlarga aylanishi uchun bor imkoniyati darajasida birgalikda shug‘ullanishga qaror qilishganini bildirishdi. Har ikki mahalla vakillari tomonidan Akmal va Rasul Shukurovlarni sog‘lom hayot muhitiga qaytishiga kafolat xati berilgani va ularning qilmishidan chin ko‘ngildan pushaymon ekanligi hisobga olinib sud o‘z hukmini o‘qib eshittirdi.

Sud hukmiga ko‘ra, Akmal va Rasul Shukurovlar O‘zbekiston Respublikasi Jinoyat Kodeksining 131-moddasi 3-qismi bilan aybli deb topilib, 3 yil 6 oyga ozodlikni cheklash jazo qo‘llanildi.