Alisher Usmonov “Everton” va “Bavariya”ga mablag‘ tikishga tayyor ekanligini ma’lum qildi

Londonning “Arsenal” klubi kapitalidagi 30 foizlik ulushini sotgan rossiyalik biznesmen Alisher Usmonov darhol boshqa ko‘plab futbol klublariga pul tikish borasida takliflar oldi. Bu haqda Usmonovning Bloomberg’ga bergan intervyusiga tayanib, Spot xabar berdi.

Milliarderning so‘zlariga ko‘ra, gap unga klub boshqaruviga ta’sir o‘tkazish imkonini beruvchi kelishuv haqida ketmoqda va u barcha variantlarni ko‘rib chiqmoqda.

Xususan, Usmonov investitsiyalarini Liverpulning “Everton” klubida kengaytirish ehtimolini yashirmayapti. Klubning eng yirik aksioneri eronlik biznesmen Farhod Moshiriy hisoblanadi.

Biroq Usmonovning futbol sohasidagi manfaatlari faqat Angliya bilan chegaralanmaydi. Uning so‘zlariga ko‘ra, u Myunxenning “Bavariya”, Italiyaning “Roma” va “Milan” jamoalari ishlariga qiziqmoqda.

Financial Times ekspertlarining hisob-kitobiga ko‘ra, “Arsenal”ning yirik aksioneri Sten Kronkega sotilgan klubning 30 foizlik aksiyasi uchun Usmonov 550 million yevro olgan.

Usmonov “Arsenal”ning egalaridan biriga aylangan 2007-yildan buyon uning aksiyalar paketi qiymati to‘rt baravardan ko‘proqqa oshgan.