Tadbirkor Jahongir Umarovning Toshkent shahar IIBB xodimlari tomonidan qo‘lga olingani va uning tergov qilingani ortidan IIV xizmat tekshiruv o‘tkazdi. Natijada JQB xodimi, tergovchi lavozimidan ozod etildi. Bu haqda UzNews xabar bermoqda.
Olmazor tuman jinoyat ishlari bo‘yicha sudi o‘z binosida tadbirkor Jahongir Umarov “ishi” bo‘yicha sud-tergov harakatlarini olib bormoqda. Hozirda, guvoh va xolislar sudda o‘z ko‘rsatmalarini bermoqda.
Ayni mana shu paytda, advokatlar tomonidan Jahongir Umarovning qo‘lga olinishi, uni Toshkent shahar IIBB binosida kaltaklangani va unga nisbatan bo‘lgan tergov harakatlarida bir qator qonun buzilishlar bo‘lganligi aytilib, bu holat bo‘yicha IIV tomonidan xizmat tekshiruvi o‘tkazilishi borasida sudga iltimosnoma bilan murojaat qilingan.
Sudga raislik qiluvchi Zafar Bobonov bu bo‘yicha ajrim chiqardi va ayni mana shu ajrim yuzasidan Ichki ishlar vazirligi O‘z xavfsizlik boshqarmasi xodimlari tomonidan xizmat tekshiruvi o‘tkazildi.
O‘z xizmat vazifalarini vijdonan, yuksak kasbiy darajada bajarish o‘rniga, ularga mas’uliyatsizlik bilan qarab, 2018-yil 22-yanvar kuni soat 21:00 da Jinoyat-protsessual kodeksi (JPK)ning 224-moddasi tartibida ushlanib, vaqtinchalik saqlash hibsxonasiga olib kelingan vaqtida fuqaro Jahongir Umarov tanasida o‘tkazilgan ko‘rik davomida “yuz, yelka, ikkala tizza, qovurg‘a, teri usti, ikkala oyoq ostlarida ko‘karish va shilinishi” ko‘rnishidagi bir qator tan jarohati belgilari mavjud bo‘lsa-da, ushbu tan jarohatlari go‘yoki, J. Umarovning so‘zidan yiqilib olganligi haqida asoslantirilmagan dalolatnoma tuzishgan.
Aniqlangan tan jarohatlari bo‘yicha tibbiy ma’lumotnoma olish choralarini ko‘rmaganliklari, holat bo‘yicha nazorat qiluvchi prokurorga xabar bermaganliklari, tergovchining ozod qilish haqidagi qarori ijrosini ta’minlamaganliklari, bundan tashqari 2018-yil 23, 24, 25, 26, 27, 29, 30, 31-yanvar hamda 1-fevral kuni Jahongir Umarovni tergov organlarining ruxsatisiz va konvoy kuzatuvisiz tezkor xodimlarga berib yuborishganligi oqibatida fuqarolar tomonidan ichki ishlar organlari xodimlariga nisbatan salbiy fikrlar tug‘ilishiga yo‘l qo‘yganliklari, ushbu xatti-harakatlari bilan IIVning 2016-yildagi 82-sonli, 2017-yildagi 171-sonli buyruq talablarini qo‘pol ravishda buzganliklari uchun bir qator xodimlar jazolandi.
Jumladan, Toshkent shahar IIBB vaqtincha saqlash hibsxonasi sobiq inspektori serjant Ravshon Sharipov hamda PPX va JTSB bo‘linmalari vaqtincha saqlash hibsxonasi inspektor-navbatchisi serjant Bahrom Ashiraliyevga “hayfsan” intizomiy jazosi, katta serjant Baxtiyor Usmonovga esa “qattiq hayfsan” intizomiy jazosi tayinlandi.
Tadbir davomida yo‘l qo‘ygan kamchilik va xatolari uchun esa IIBB Jinoyat-qidiruv boshqarmasi Uyushgan jinoyatchilikka qarshi kurashish bo‘limi katta tezkor vakili podpolkovnik Abulazim Mahmudov, bo‘limning katta tezkor vakili podpolkovnik Aziz Zakirov, katta tezkor vakil podpolkovnik Yusufbek Nurmuhamedovning har biriga “hayfsan” e’lon qilingan.
Uyushgan jinoyatchilikka qarshi kurashish bo‘limi o‘ta muhim ishlar bo‘yicha tezkor vakili mayor Fatxiddin Nurutdinov esa ichki ishlar organlaridan bo‘shatilgan.
Fuqarolarda tergov organlarining faoliyati shaffofligiga shubha paydo bo‘lishiga sababchi bo‘lganligi, shoshma-shosharlik bilan jinoyat ishini tamomlagani va qator kamchiliklarga yo‘l qo‘ygani uchun Toshkent shahar IIBB huzuridagi Tergov boshqarmasi iqtisodiyot sohasidagi jinoyatlarni tergov qilish bo‘limi o‘ta muhim ishlar bo‘yicha tergovchisi mayor Jasur Yakubov egallab turgan lavozimidan ozod etilgan.
Toshkent shahar IIBB huzuridagi Tergov boshqarmasi iqtisodiyot sohasidagi jinoyatlarni tergov qilish bo‘limi boshlig‘i vazifasini bajaruvchi mayor Ulug‘bek Abdurahmonovga “qattiq hayfsan” berildi.
Shuningdek, o‘z xizmat vazifalarini to‘liq bajarmagan Toshkent shahar IIBB EKM shaxsni identifikatsiya qilish bo‘limi boshlig‘i podpolkovnik Shahzod Shokirov va shu bo‘lim katta eksperti kapitan Sardor Karimovga intizomiy jazo berish masalasi Toshkent shahar IIBB Intizomiy kengashda ko‘rilishi ham xizmat tekshiruv xulolasasida ko‘rsatib o‘tilgan.
Xizmat tekshiruv xulosasi nusxasi jinoyat ishlari bo‘yicha Toshkent shahar Olmazor tuman sudiga, ma’lumot uchun O‘zbekiston Bosh prokuraturasiga yuborilgan.
Ushbu xizmat tekshiruvi xulosasi shaxsiy tarkib o‘rtasida keng muhokama etilib, kelgusida joylarda yuqorida qayd etilgan holatlarga yo‘l qo‘ymaslik va oldini olish uchun aniq amaliy chora-tadbirlar belgilanishi ichki ishlar vaziri o‘rinbosari — Toshkent shahar IIBB boshlig‘i general-mayor Rustam Jo‘rayev zimmasiga qoldirilgan.
Izoh (0)