Nishon tumani fuqarolik holati dalolatnomalarini yozish bo‘limida qorovul bo‘lib ishlagan A.O. bo‘lim binosida boshqa “xizmat” turini ham yo‘lga qo‘yib olgan ekan. Bu haqda “Xabar.uz” ma’lum qildi.
Kunduzgi ish jarayoniga mutlaqo zid ravishda tunlari bu yerga yengil-yelpi hayotga ruju qo‘ygan erkak va ayollar kelib turgan. Bino qorovuli esa ma’lum haq evaziga ularga joy hozirlab beravergan.
Bu safar ham Qarshi shahri, Paxtazor mahallasida yashovchi Yu.Z. Nishon tumani, Talimarjon shaharchasida yashovchi N.D. bilan tungi soat 23 lar atrofida tuman markazida uchrashadi. Uchrashuvdan maqsad esa o‘zlarining hirsini qondirish edi. Buning uchun xilvat joy topishsa bo‘lgani.
Joy masalasida biroz o‘ylashgandan so‘ng qiz tanishlaridan tuman fuqarolik holati dalolatnomalarini yozish idorasi qorovuli pul evaziga joy berishi haqida eshitganligini aytadi. Shundan so‘ng ular ushbu binoga qarab yo‘l oladi va idora eshigini taqillatadi.
Bu paytda qorovul mahallasidagi to‘ydan so‘ng endi kelib joyiga cho‘zilgan edi. Shunga qaramay, erkak va ayolning tashrifi uni bezovta qilmadi. Nima maqsadda kelishganini anglab, chopqillab chiqib darvozani ochdi.
O‘zaro kelishuv 66 yoshli otaxonning 30 ming so‘m evaziga nevarasi tengi yigit va qizga o‘z joyini bo‘shatib berib, darvozaga qulf solgancha tashqariga chiqib ketishi bilan yakunlandi.
Ammo bu vaqtda tuman markazida yarim tunda bemaqsad yurgan yigit va qiz allaqachon hududda faoliyat olib borayotgan ichki ishlar xodimlarini shubhalantirgan, juftlik kuzatilmoqda edi. Ular FHDYo binosiga kirishgach, IIB xodimlari qorovuldan izoh talab qildi.
Ko‘p o‘tmay barcha holatga oydinlik kiritildi. A.O.ning pul evaziga fuqarolar — Yu.Z. va N.D ga fahsh ishlarini amalga oshirish uchun sharoit yaratib bergani o‘z isbotini topib, holat hujjatlashtirildi.
Endi qo‘shmachi qorovul bu qilmishi uchun qonuniy jazoga tortiladi.
Izoh (0)