Rossiya, Qozog‘iston, Ozarbayjon, Eron va Turkmaniston prezidentlari Kaspiy dengizining huquqiy maqomi to‘g‘risidagi konvensiyani imzoladi. Bu haqda Meduza xabar bermoqda.
Hujjatga muvofiq, har bir mamlakat 15 dengiz milidan ortiq bo‘lmagan kenglikda Kaspiydagi o‘z hududiy suvlari chegarasini o‘rnatadi. Dengiz suv sathining asosiy maydoni umumiy foydalanuvda qoladi, dengizning tubi va yerosti boyliklarini Kaspiybo‘yi mamlakatlari o‘zaro bo‘lishib oladi.
“Interfaks” agentligining qayd etishicha, ushbu konvensiya Kaspiy dengizida begona mamlakatlarning qurolli kuchlari bo‘lishini taqiqlaydi.
“Hujjat Rossiya, Qozog‘iston, Ozarbayjon, Turkmaniston va Eronning Kaspiy maqomi bo‘yicha nuqtai nazarlarini bir nuqtaga kelishtirdi. Sohilbo‘yi mamlakatlarining bu boradagi bahs-munozaralari 22 yildan beri davom etib kelayotgan edi”, — deyiladi “Interfaks” axborotida.
Sovet davrida Kaspiy dengizining maqomi SSSR va Eron o‘rtasidagi kelishuv asosida tartibga solingan. Sovet Ittifoqi parchalanib ketgach, Qozog‘iston, Ozarbayjon va Turkmaniston ham dengizga chiqish yo‘liga ega bo‘ldi.
Kaspiybo‘yi mamlakatlari o‘rtasidagi muzokaralar 1996-yilda boshlangan. O‘tgan davr mobaynida besh mamlakatning har biri uchun o‘z akvatoriyasi chegaralarini belgilash, shuningdek, dengiz tubidan quvurlar o‘tkazish masalasi bahsli bo‘lib qolayotgan edi.
Izoh (0)