Toshkent viloyatida surxondaryolik yigit 2 ishchisini otib qo‘ygan dam olish maskani faoliyati o‘rganildi

Toshkent viloyatining O‘rta Chirchiq tumanida 12-iyul kuni surxondaryolik Akobir Ro‘zimboyev pnevmatik to‘pponchadan dam olish maskanining 2 ishchisini jarohatlagan. Ro‘zimboyev qochib ketgan. IIV unga nisbatan qidiruv e’lon qilgan. “XXI asr” nashri muxbiri voqea tafsilotlarini o‘rganish uchun “Toshkent dengizi” deb ataluvchi Tuyabo‘g‘iz suv omboriga borgan va dam olish maskanidagi holatni o‘rganib, uning abgor ahvoli haqida tanqidiy maqola tayyorlagan. Maqola Uz24 tomonidan e’lon qilingan. Quyida maqolani to‘liqligicha e’tiboringizga havola qilamiz.

Suv ombori hududiga kirib borganimizda, tushdan so‘ng soat 15:00 bo‘lishiga qaramay, jazirama kuydirar, quyuq daraxtzor oralab salqin sohilga yaqinlashishga oshiqardik. Soya bo‘lsa-da, negadir ob-havo dimiq, bo‘g‘iq edi.

Oldi-atrofimiz tumonat odam, mashina kirish joyida “stoyanka” uchun bir yigit pul undirardi. O‘ng tarafda bir-biriga qarama-qarshi, oldinma-keyin tartibsiz qurilgan so‘rilar. Supalarning atrofi eski gazlamalar yoki klyonkalar bilan o‘ralgan. Ko‘rpa-to‘shak, yostiqlarni-ku aytmasa ham bo‘ladi, hatto yamoq ham solinmagan.

So‘rilarni narxini surishtirdik. Kechga yaqin borganimiz uchunmi, mijoz biroz siyraklashgan ekan. Yosh yigit uch-to‘rt soat uchun 30 ming so‘mga bitta supa ajratib berishini aytdi.

Atrofga nazar tashlaymiz. Klyonkalar, so‘ri tagida uyilib yotgan ashqol-dashqollar – axlat tiqilgan selofanlar, bijg‘ib yotgan pivo baklajkalari, aroq shishalari... O‘sha tarafga sal yaqinroq yursangiz, qo‘lansa hid dimoqqa uradi. Daydi it-mushuklar esa ochiq qolgan bir idishni hidlab, ichini yalardi. Tarvuz va piyoz po‘choqlari, qoramol suyaklari so‘ri osti yaqin orada supurilmaganini aytib turibdi.

Hamma xizmatlar uchun o‘zi bilganicha narx belgilaydi, tartib masalasida birov g‘ing demaydi.

Maskan “Parizod Omad” MChJga qarashli bo‘lib, har bir ijarachining sanitar-epidimeologik holati tekshiriladi. Har kuni emas-u, onda-sonda. Mijozlarni yo‘qotib qo‘ymaslik uchun spirtli ichimliklar ham sotiladi. Albatta, bu yer bugungi kun talablariga javob bermasligi va tez orada qaytadan qurilishi haqidagi gap-so‘zlar bor. Ijarachilardan birining so‘zlariga ko‘ra, yoz mavsumi uchun “Parizod Omad”ga 5 million so‘m to‘lab qo‘yilgan. Odam esa faqat dam olish kunlari ko‘proq, boshqa paytlari kimdir kelishini kutib o‘tirishadi.

– So‘rilarda sharoit yaxshi emas, – deydi dam oluvchilardan biri, samarqandlik Obid Olloyorov. – Qo‘shni supalardan turli gap-so‘zlar eshitilib qolarkan. Urush-janjal shundan chiqadi.

Ishchilarning aytishicha, surxondaryolik yigit ham joy talashib ishchilar bilan urishib ketgan.

Cho‘milish hududida bolalar uchun mo‘ljallangan alohida muhofaza hududi yo‘q, qutqaruv xizmati faoliyati yo‘lga qo‘yilmagan. Ayollar ham, bolalar ham, mast-alast kishilar ham aralash-quralash bo‘lib suvga sho‘ng‘imoqda. Turli xil oqindilar, dam oluvchilarning o‘ta bepisandligi, ekologik madaniyatga e’tibor qilmaslik oqibatida suv ifloslangan.

O‘rtachirchiq tuman hokimining kichik sanoat zonalari, investitsiya va turizm bo‘yicha o‘rinbosari N.G‘afforovaning ma’lum qilishicha, dam olish maskani infratuzilmasini yaratish maqsadida xitoylik investorlar bilan qiymati 20 million dollarga teng shartnoma tuzilgan. Loyiha baliqchilik va qisqichbaqachilik bo‘yicha maxsus hudud va zamonaviy tipdagi tematik park barpo etish kabi ikki yo‘nalishdan iborat.