Oliy Majlis Senatining Yoshlar, madaniyat va sport masalalari qo‘mitasining o‘tgan davrdagi faoliyati yakunlari va istiqboldagi yo‘nalishlariga bag‘ishlangan matbuot anjumani bo‘lib o‘tdi. Bu haqda “Xalq so‘zi” xabar berdi.
Tadbirda madaniyat sohasidagi muammo va kamchiliklar xususida ham so‘z yuritildi. Ayniqsa, an’anaviy qo‘shiqchilik va san’atkorlar faoliyatidagi kamchiliklar tilga olindi.
— Ko‘plab muammolar sohadagi eski qarashlar va korrupsion hatti-harakatlar bilan bog‘liq, , — dedi Madaniyat vazirining birinchi o‘rinbosari Ozodbek Nazarbekov. — Misol uchun, xalqaro tanlovlar laureatlari bo‘lgan yoshlar O‘zbekistondagi oliy ta’lim muassasalariga imtihonsiz qabul qilinishi belgilangan. Ammo bugungi kelib bu shunday muammoga aylandiki, qabul kvotasi 10 ta bo‘lsa, 20 ta laureat o‘qishga topshiradi.
Laureatlar bu mukofotni qanday qo‘lga kiritgani haqida gapirmasa ham bo‘ladi. Bu nimaga olib kelyapti? Puli bilan chetga chiqib kelgan yoshlar o‘qishga imtiyozli qabul qilinyapti, haqiqiy iste’dodlar esa chetda qolib ketyapti. Bu borada hali qiladigan ishlarimiz ko‘p. Vazirlik tomonidan aynan qanday xalqaro va nufuzli tanlovlar g‘oliblariga imtiyoz berilishi haqida ro‘yxatni shakllantirish tashabbusi bilan chiqdik. Mazkur muammo amaliy yechim topishiga harakat qilamiz.
Izoh (0)