O‘zbekistonda davlat organlarining AKTni joriy etish va rivojlantirish bo‘yicha yangi reytingi e’lon qilindi

2018-yil II chorak yakuni yuzasidan jami 103 ta davlat va xo‘jalik boshqaruvi, mahalliy davlat hokimiyati organlari, jumladan, 47 ta davlat boshqaruvi organlari, 42 ta xo‘jalik boshqaruvi organlari va 14 ta mahalliy davlat hokimiyati organlari faoliyatida AKTni joriy etish va rivojlantirishning holati baholandi. Bu haqda “Elektron hukumat” tizimini rivojlantirish markazi xabar bermoqda.

AKTni joriy etish va rivojlantirish yuzasidan baholangan davlat organlari orasida “Kafolat” sug‘urta kompaniyasi yuqori ko‘rsatkichlarga erishgan (100 balldan 96,85 ball). Xalq banki 95,04 ball bilan reytingda 2-o‘rinni egallagan. “O‘zbekiston rangli metall parchalari, chiqindilarini tayyorlash va qayta ishlash zavodi” esa 94,20 ball bilan uchinchi o‘rinni egalladi, yakuniy ko‘rsatkichlar bo‘yicha o‘rtacha o‘sish 2017-yilning shu davriga nisbatan 9,80 foizni tashkil etdi.

Shuningdek, reyting baholash natijalariga muvofiq, yetakchi beshlikdan Avtomobil yo‘llar davlat qo‘mitasi — 92,49 ball (o‘tgan yilning mos davriga nisbatan o‘sish 6,43 foiz), shuningdek, “O‘zsanoatqurilishbank” – 90,65 ball (o‘tgan yilning shu davriga nisbatan o‘sish 22,71 foiz) o‘rin olgan.

O‘zbekiston fermer, dehqon xo‘jaliklari va tomorqa yer egalari kengashi 12,53 ball ko‘rsatchiklari bilan reyting natijalarida oxirgi o‘rinni egallagan, shu bilan birga reyting natijalari 2017-yilning II choragiga nisbatan 19,48 foizga kamaygan.

2018-yil II chorak natijalariga ko‘ra Yagona interaktiv davlat xizmatlari portali orqali interaktiv davlat xizmatlarini ko‘rsatish bo‘yicha kelib tushgan murojaatlarni ko‘rib chiqish muddatlari tizimli ravishda buzilganligi sababli rasmiy veb-sayt va interaktiv davlat xizmatlarini ko‘rsatish bo‘yicha ko‘rsatkichlari yomonlashishi kuzatilgan.

Xususan, tashkilot rasmiy veb-sayti va IDX ko‘rsatish ko‘rsatkichlari qonun va boshqa me’yoriy hujjatlarga muvofiq joriy qilingan davlat interaktiv xizmatlari sifat jihatdan ham yomonlashgan bo‘lib, mazkur yo‘nalishda o‘rtacha ko‘rsatkich 50 dan 31,44 tashkil etdi (2017-yilning II choragiga nisbatan kamayish 2,77 foiz).

To‘liq reyting bilan bu yerda tanishish mumkin.