Ispaniya sudi tomonidan qariyb 3 ming yilga ozodlikdan mahrum qilingan ETA tashkilotining jangarisi Santi Potros ozodlikka chiqdi. Bu haqda “Komsomolskaya pravda” xabar bermoqda.
Terrorchi basklarning ETA (Euzkadi Ta Azkatasuna, “Basklar mamlakati va ozodlik”) separatik guruhiga aloqador. Santi Potrosning haqiqiy ismi — Santyago Arrospide Sarasola. Potros 5-avgust kuni qamoqxonadan chiqarilgan.Prokuratura Potrosning 40 dan ortiq terakt uyushtirganini isbotlagan. Jumladan, Potros 1987-yilda Barselonadagi Hipercor supermarketda amalga oshirilgan portlashga aloqador hisoblanadi. Terakt oqibatida 21 kishi halok bo‘lgan.
Potros 1987-yili qurol va portlovchi moddalar saqlagani uchun Fransiyada ilk marta qamoq jazosiga hukm qilingan. 13 yillik jazoni o‘tagan Potros 2000-yili Ispaniyaga ekstraditsiya qilingan. Ispaniyada Potros sodir etgan 11 ta jinoyati uchun 3 ming yilga qamalgan.
Aslida Potros hech qachon ozodlikka chiqmasligi kerak edi. U qamoqda 31 yil o‘tirgan: 12 yil Fransiyada va 18 yil Ispaniyada.
2006-yili Ispaniya sudi jazoning maksimal muddatini 30 yil deb belgiladi. Shunday qilib, Potros 2030-yilgacha qamoqda o‘tirishi kerak edi. Biroq Inson huquqlari bo‘yicha Yevropa sudi Parot doktrinasini (muddatidan oldin ozodlikdan chiqish huquqini bermaslik) bekor qilishi natijasida Potrosning jazo muddati 5 yilga qisqartirildi va u 2025-yilgacha qamoqda o‘tiradigan bo‘ldi. 2008-yili Yevropa Ittifoqi hududida jazo muddatlarini umumlashtirib hisoblash haqida qaror qabul qildi. Shunday qilib, dunyoning eng xavfli terrorchisi 31 yillik jazo muddatini o‘tab, ozodlikka chiqdi.
Izoh (0)