Samarqand shahridagi umumta’lim maktablarini yangi o‘quv yiliga tayyorlash bo‘yicha hududlarning sektor rahbarlari boshchiligida amaliy seminar tashkil etildi, deb xabar beradi “Daryo” muxbiri Farhod Norbo‘tayev.
Maktab direktorlari, o‘quv ishlari bo‘yicha hamda xo‘jalik ishlari bo‘yicha direktor o‘rinbosarlari ishtirok etgan tadbirda barcha ta’lim muassasalarini joriy yilning 15-avgust kuniga qadar yangi o‘quv yiliga tayyorlash bo‘yicha zarur chora tadbirlar belgilandi.
O‘tkazilgan seminarda umumta’lim maktablarining yangi o‘quv yiliga tayyorgarligi qanday tartibda bo‘lishi haqida ma’lumot berib o‘tildi.
Seminarda Samarqand shahar hokimi Furqat Rahimov ta’lim muassasasi rahbarlarining maktabdagi muammolarini eshitib, ularga imkon qadar amaliy yordam berishga va’da berdi. Shahar hokimi maktab rahbarlariga ta’lim muassasasini yangi 2018—2019-o‘quv yiliga tayyorlash bo‘yicha ta’lim muassasini obodonlashtirish, maxsus fan va laboratoriya xonalarini Xalq ta’limi vazirligi tomonidan berilgan tavsiyalar asosida jihozlash kerakligini bildirib o‘tdi.
Shuningdek, kuz-qish mavsumida ortiqcha muammo yuzaga kelmasligi maqsadida issiqlik tizimi holatini yaxshilash, elektr tizimlarini talab darajasiga keltirish, hojatxona, oshxona, sinf xonalarini tayyorlash, maktab me’yoriy hujjatlarini tartibga keltirish, yong‘in xavfsizlik burchagini to‘liq ta’minlash ishlari bo‘yicha aniq ko‘rsatma va topshiriqlar berdi.
Izoh (0)