Click kompaniyasi Davlat Test Markazi bilan hamkorlikda oliy o‘quv yurtlariga topshirilgan imtihonlarning natijalarini mobil telefon orqali bilib olish imkonini beruvchi xizmatni ishga tushirdi. Bu haqda kompaniya matbuot xizmati xabar bermoqda.
Davlat Test Markazi bilan hamkorlikda tushirilgan xizmat yordamida bugungi kundan boshlab test natijalarini bilib olish maqsadida so‘rov yuborilishi mumkin. Test natijalari oshkor qilinganidan so‘ng, javoblar darhol foydalanuvchiga yuboriladi.
“Natijalar oshkor qilinishidan avval qabul qilingan so‘rovlarga birinchi navbatda ishlov beriladi. Abituriyentlar imtihonlarning aniq sanasini, joyini va vaqtini, o‘z pasportining raqamini http://testday.dtm.uz/ saytida kiritib bilib olishlari mumkin!”, — deyiladi xabarda.
So‘rovlar Telegram bot, Click Uzbekistan ilovasi, yoki USSD-menyu orqali yuborilishi mumkin. Xizmat narxi 2300 so‘m va Click tizimiga ulangan kartalaridan bevosita undiriladi.
Telegram orqali javoblarni olish uchun @clickuz botiga /start buyrug‘ini yuborish lozim. Ro‘yxatdan o‘tilgandan so‘ng, “DTM-2018 natijalari” punkti chiqadi. Bu yerga javob varaqasining raqamlarini kiritish lozim.
USSD-menyu orqali natijalarni bilish uchun, *880# ni terib, paydo bo‘lgan menyudan “DTM-2018” qismini tanlagan holda, tizimning ko‘rsatmalariga rioya qilish lozim.
Izoh (0)