Mirzo Ulug‘bek tumanidan oqib o‘tuvchi Salor, Qorasuv va Pulemas-yangi magistral kanallari, Yalong‘och, To‘rt, Yuzariq, Oqqo‘rg‘on, Darxon xo‘jaliklararo kanallaridagi vaziyat achinarli ekanligi aniqlandi, deb xabar beradi tuman hokimligi matbuot xizmati.
Tuman bo‘yicha tuzilgan ishchi guruhlari tomonidan kanallarning muhofaza hududlarida o‘rganishlar davomida aholi tomonidan o‘zboshimchalik bilan qurilgan turar va noturar joylar, ovqatlanish maskanlari, choyxonalar va garajlar va boshqa binolar qurib olinganligi ma’lum bo‘ldi.
Bundan tashqari, fuqarolar tomonidan maishiy va qurilish hamda boshqa chiqindilarni suv bo‘yiga uloqtirib ketilishi oqibatida yillar davomida ular katta uyumlarga aylanib, antisanitariya holatiga kelib qolganligi aniqlandi.Bugungi kunda kanallar bo‘yi hududi mavjud noqonuniy qurilmalarni buzish bo‘yicha sudlarga davo arizalari kiritilmoqda. Har kuni Favqulodda vaziyatlar xodimlari, obodonlashtirish boshqarmasi, mahalla faollari va aholi ishtirokida ravishda kanal bo‘ylarini tozalanib, tonnalab chiqindilar maxsus texnika vositalarini jalb etgan holda chiqarib tashlanmoqda.
Tumandagi A.Yugnakiy, Xumoyun, Avayxon, Chimyon, Oltintepa, Ulug‘bek va boshqa mahallalarda ariq va kanallar, ularning o‘zanlari, qirg‘oq bo‘ylarini tozalash va obodonlashtirish, muhofaza hududlarida barpo etilgan noqonuniy qurilmagan va o‘ramalarni bartaraf etish borasida keng ko‘lamli ishlar ketmoqda.
Suv kanallardan hech qanday to‘siqlarsiz ravon oqmoqda. Xususan, kanallar yoqasida aniqlangan 100 dan ortiq garajlar, 151 ta turar joy va 61 ta noturar joy binolari aniqlanib, qurib olingan binolarga nisbatan 47 ta da’vo arizalari kiritildi, o‘ramalar va garajlar aholi ishtirokida o‘rnatilgan tartibda bartaraf etilmoqda.
Endilikda, kanallar yoqasida tekislanib, piyodalar yo‘laklari qayta ta’mirlanadi, atrofiga ko‘chatlar o‘tqazilib, yo‘l chetiga zamonaviy yoritish chiroqlari o‘rnatiladi. Shuningdek, fuqarolar xavfsizligini ta’minlash maqsadida kanal atroflari to‘silib, sohillariga qulay bo‘lgan o‘rindiqlar o‘rnatiladi hamda ushbu joylarda fuqarolar sayr qiladigan ko‘rkam maskanlar barpo qilish ko‘zda tutilgan.
Izoh (0)