Meksikada 1-avgust, chorshanba kuni qulagan yo‘lovchi samolyotining halokatiga kuchli shamol sabab bo‘lgani aniqlandi. Bu haqda Gaceta Mexicana’ga tayanib, “Vedomosti” xabar bermoqda.
Meksikaning Durango shtati gubernatori Xose Rosas Aispuroning so‘zlariga qaraganda, Aeromexico aviakompaniyasining Embraer 190 layneri 300 metr balandlikka ko‘tarilganda shamol birdan kuchaygan. Shundan so‘ng samolyot qulashni boshlagan.
Aeromexico kompaniyasi samolyoti Meksika shimolida 1-avgust, chorshanbaga o‘tar kechasi qulab tushgan. Samolyot bortida 103 kishi bo‘lgan. Hech kim halok bo‘lmagan. Layner Viktoriya-de-Durango aeroportidan mamlakat poytaxti Mexiko shahriga borish uchun uchgan. Aviakompaniya ma’lumotlariga qaraganda, samolyot 10 yil davomida foydalanishda bo‘lgan.
Yerga qulagan samolyot har ikki dvigatelini yo‘qotgan va natijada yong‘in boshlangan. Yo‘lovchilarning barchasi yong‘in avj olgunga qadar evakuatsiya qilingan.
Aviakompaniya bergan ma’lumotlarga qaraganda, samolyot bortida 99 nafar yo‘lovchi bo‘lgan. Ulardan 88 nafari katta yoshlilar, 9 nafari voyaga yetmaganlar va 2 nafari go‘daklar edi. Samolyot ekipajida 4 kishi — 2 nafar uchuvchi va 2 nafar bort kuzatuvchi bo‘lgan. Durango shtati gubernatorining ma’lum qilishicha, uchuvchilardan birining ahvoli o‘ta og‘ir deya baholangan.
Eslatib o‘tamiz, Embraer 190 layneri halokatidan keyin 98 kishi kasalxonalarda qolmoqda.
Izoh (0)