Toshkent prokuraturasi Chirchiq daryosi, shuningdek, poytaxtdan oqib o‘tuvchi kanallar va kollektorlarning qirg‘oqbo‘yi joylarida o‘tkazilgan 10 kunlik tekshirish davomida 769 ta noqonuniy qurilishni aniqladi. Ular buzib tashlanadi. Bu haqda O‘zbekiston Bosh prokuraturasi Facebook’dagi sahifasida ma’lum qildi, deb yozadi “Gazeta.uz”.
O‘tkazilayotgan “Toza kanal” kampaniyasi doirasida har bir sektordan bittadan, jami 44 ta ishchi guruhi, shuningdek, Oliy Majlis senatorlari va deputatlari, Toshkent shahar va tumanlar kengashlari deputatlari, “Mahalla” xayriya jamg‘armasi xodimlaridan iborat 11 ta ishchi guruh shakllantirilib, tadbirga zarur bo‘lgan 176 ta texnika vositasi jalb etilgan.
Toshkent shahrida umumiy uzunligi 412,5 kilometr bo‘lgan 129 ta kanal, jumladan 17 ta magistral, 25 ta xo‘jaliklararo, 80 ta xo‘jalik ichki kanallar va 7 ta kollektor mavjud bo‘lib, xatlov natijasida 75,6 kilometr uzunlikdagi 37 ta ichki kanallar yopilib ketganligi, yer maydonlaridan esa uy-joy va boshqa maqsadlarda foydalanib kelinayotganligi qayd etildi.
Izoh (0)