Toshkent viloyati Yo‘l harakati xavfsizligi boshqarmasi tomonidan o‘tkazilayotgan reyd tadbirlari davom etmoqda. Bu haqda O‘zA xabar berdi.
Viloyat YHXB matbuot xizmati 27-iyul kuni Yangiyo‘l tumani va Yangiyo‘l shahrida o‘tkazilgan tadbirlar tafsiloti haqida xabar berdi. “Reyd davomida to‘xtatilgan haydovchilarning muomalasi kishini ajablantiradi”, deyilgan xabarda.
Qoida buzgan yoki tegishli hujjatlarida kamchilik aniqlangan haydovchilarning “Komandir, yer dumaloq, hali ko‘rishamiz”, “Komandir, bizda ham qolib ketmas” yoki mobil telefonidan “akaxonlariga” telefon qilib, “Mana, telefonni oling, hech bo‘lmasa, telefonga javob bering” qabilidagi iddaoli, do‘q-po‘pisa ohangidagi gaplarini YHXB xodimlari tez-tez eshitmoqda.
Matbuot xizmati xabarida ta’kidlanganidek, bu kabi mantiqsiz va kurakda turmaydigan gaplar ensani qotiradi. O‘z o‘rnida savol ham tug‘iladi: avtomobilni boshqarish oldidan zarur hujjatlar bor-yo‘qligini bir qur ko‘zdan kechirish shunchalik qiyinmi? Yoki haydovchilar shu qadar hafsalasiz, ochiqroq aytganda, madaniyatdan yiroqlashib borayaptimi?
Qizg‘in jarayondagi reyd tadbirlari davomida transport vositasini tegishli hujjatlarsiz, oynalarining rangini o‘zgartirgan, asosan qoraytirgan holda, belgilangan tartibda ro‘yxatdan o‘tkazilmagan, ya’ni gazda ishlash uchun qayta jihozlangan transport vositalarini hujjatsiz boshqargan 189 nafar haydovchi aniqlanib, ularga nisbatan ma’muriy bayonnomalar rasmiylashtirildi. Ular boshqaruvidagi transport vositalari vaqtinchalik jarima maydonchasiga qo‘yildi.
Reyd tadbirlari 28-iyul kuni Chirchiq shahrida davom etdi.
Izoh (0)