Yoshi ellikni qoralagan zarbdorlik Olmos Qilichev (ism-shariflar shartli) giyohvand moddalar sotishni o‘ziga kasb qildi. Bu haqda Jizzax viloyati IIB matbuot xizmati ma’lum qildi, deya xabar beradi O‘zA.
Ishining jinoyat ekanini yaxshi bilgan, lekin oson pul topishni ko‘ngilga tuygan qahramonimiz bu borada juda ehtiyotkor bo‘ldi. Faqat “ishonchli mijozlar” bilan aloqa qilar, begonalarga iloji boricha yaqinlashmas, shubha uyg‘otganlar bilan umuman gaplashmasdi.
Ustomon “sotuvchi” kasalini har qancha yashirmasin baribir isitmasi oshkor qildi. Zarbdor tumani ichki ishlar bo‘limi xodimlari bu xatti-harakatlardan xabar topib, og‘ufurushni jinoyat ustida, rad etib bo‘lmas dalillar bilan ushlash choralari ko‘rilayotgan bir paytda G‘iyosxon Omonjonov paydo bo‘ldi. Ilgari o‘g‘irlik va firibgarlik jinoyati uchun sudlanib, o‘ziga berilgan tegishli jazoni olgan G‘iyosxon Omonjonov Olmos Qilichevning hatti-harakatlaridan xavotirda ekanini, odamlarga zarari tegayotganini bildiradi. U odamlarning hayotiga, oilasiga raxna soluvchi og‘ufurushlik jinoyatiga chek qo‘yishda o‘z hissasini qo‘shishga tayyor ekanini, buning uchun shartli xaridor vazifasini bajarib berishini aytadi. Bir muddat o‘rganishlardan so‘ng taklif ma’qul deb topildi.
Ustomon “sotuvchi” bilan shartli xaridor tez til topishdi. Bir birlariga “Kelishdik, o‘zimizdan ekansiz”, degancha qo‘l berishdi. “Mol” xaridorga, pul “sotuvchi”ga uzatilayotgan payt ichki ishlar xodimlari paydo bo‘ldi. Buni kutmagan Olmos Qilichev bir zum gangib qoldi, ammo tezda o‘ziga kelib, faol qarshilik ko‘rsata boshladi. Shu paytda uning cho‘ntagidan uyali telefoni tushib qoladi.
Gumonlanuvchini tinchlantirishga urinayotgan tezkor xodimlar aloqa vositasining yerga tushganini payqamaydi.
Voqeani bir chetda kuzatib turgan shartli xaridor esa eski odatini qo‘msab ketadi, yerda yotgan o‘zganing qo‘l telefonini olishdan o‘zini tiya olmaydi. G‘iyosxon Omonjonov ichki ishlar idorasidan uzoqlashgandan so‘ng telefon xotirasini erinmasdan ko‘rib chiqadi. Undagi telefon raqamlarini bir-bir ko‘zdan kechirar ekan, “onasi” degan nom bilan saqlangan telefon raqamlariga ko‘zi tushadi va niyati buziladi.
G‘iyosxon ertasigayoq Olmosning turmush o‘rtog‘i Gullola Qilichevaga qo‘ng‘iroq qilib, “Eringiz narkotik moddalar savdosida ayblanib, qamoqqa olindi” deydi. Xabarni eshitgan ayolning dovdirab qolganini bilgan G‘iyosxon gap orasida o‘zining viloyat ichki ishlar boshqarmasi xodimi ekanligini qistirib o‘tadi va holatni o‘nglash mumkinligiga ishora qiladi.
Tomonlar Jizzax shahridagi “Ko‘kbozor” dehqon bozori hududida uchrashadi. G‘iyosxon 5 million so‘m evaziga Olmos Qilichevni ozodlikka chiqarish imkoni borligini, pulni olgunga qadar ayblanuvchining sharoitini yengillatish choralarini ko‘rishini aytadi.
Bunday paytda to‘ladan kelgan, sochlari kalta olingan, gap-so‘zi dangal G‘iyosxon Omonjonov ayolda shubha uyg‘otmaydi. Ishonch bilan gapirayotgan, qo‘lida erining telefonini tutgan insonga ishongan ayolni tushunish mumkin, ehtimol. Turmush o‘rtog‘i unga ishonib telefonini, uy raqamini beribdimi, demak, ishonsa bo‘ladi. Birov bilmasin, deyishi ham to‘g‘ri, bu yerda pora haqida gap boryapti, axir — ayolning xulosasi shu bo‘ldi.
Aytilgan summani G‘iyosxon ko‘p kutmadi — oldi-yu g‘oyib bo‘ldi. Gullola Qilichevada esa kutishdan bo‘lak iloji qolmagandi. Ko‘p o‘tmay Zarbdor tumani Oybek mahallasida yashagan Olmos Qilichevning jinoyati o‘z isbotini topib, u ozodlikdan mahrum qilindi. Gullola Qilichova shundan so‘nggina “ichki ishlar xodimi”ni surishtira boshladi. Firibgarning tuzog‘iga tushganligini bilgan ayol bu haqda ariza bilan Jizzax viloyat Ichki ishlar boshqarmasiga murojaat qildi.
G‘iyosxon Omonjonovni topish qiyin bo‘lmadi. Firibgar dastlabki suhbatdayoq qilmishlariga iqror bo‘lgan. Ayni paytda mazkur holat bo‘yicha jinoiy ish qo‘zg‘atilib, tergov harakatlari olib borilmoqda.
Izoh (0)