O‘zbekiston Qahramoni Siyosatxon Abdullayeva 27-iyul kuni 78 yoshida vafot etdi. Bu haqda O‘zA xabar bermoqda.
Siyosatxon Abdullayeva 1940-yilda Andijon tumanida tug‘ilgandi. Mehnat faoliyatini Oltinko‘l tumanidagi jamoa xo‘jaligida oddiy ishchi sifatida boshlab, keyinchalik shu tumandagi 2-bolalar bog‘chasida tarbiyachi, bog‘cha mudirasi vazifalarida mehnat qildi.
Dehqonchilik kasbi va ilmiga alohida mehr qo‘ygan Siyosatxon Abdullayeva Andijon Paxtachilik institutini agronom yo‘nalishi bo‘yicha tugallaganidan so‘ng yana qishloq xo‘jaligi sohasiga qaytib, 1978-yildan mazkur tumanda shirkat xo‘jaligi bosh pudratchisi vazifasida o‘z mehnat faoliyatini davom ettirdi. Mamlakatda fermerlik harakati boshlangandan so‘ng “Oltinko‘l vodiy gulshani” fermer xo‘jaligini tashkil etib, umrining oxiriga qadar shu lavozimda ish olib bordi.
Abdullayeva o‘zining ko‘p yillik faoliyati davomida paxtachilik, g‘allachilik va qishloq xo‘jaligining boshqa tarmoqlarini, fermerlik harakatini rivojlantirishga munosib hissa qo‘shdi. Mohir va tajribali agronom rahbarligidagi fermer xo‘jaligi qishloq xo‘jaligi mahsulotlarini yetishtirish bo‘yicha barcha shartnoma majburiyatlarini muvaffaqiyatli bajarib, mamlakat miqyosida eng yuqori ko‘rsatkichlarga erishib kelgan.
Boy bilim va hayotiy tajribaga ega bo‘lgan Siyosatxon Abdullayeva jamoat ishlarida ham faol ishtirok etib, el-yurt o‘rtasida katta obro‘-e’tibor qozongan edi.
Siyosatxon Abdullayevaning ko‘p yillik samarali mehnatlari davlat tomonidan munosib taqdirlangan, “Do‘stlik” ordeni va “O‘zbekiston Qahramoni” unvoni bilan mukofotlangan edi.
O‘zbekiston Qahramoni vafoti munosabati bilan Prezident Shavkat Mirziyoyev, Bosh vazir Abdulla Aripov va boshqa rahbarlar hamdardlik bildirdi.
Izoh (0)