Prezidentning “Milliy kinoindustriyani rivojlantirish bo‘yicha qo‘shimcha chora-tadbirlar to‘g‘risida”gi qarorida milliy kino targ‘ibotiga ham katta ahamiyat berilgan. Bu haqda “Respublika kinoprokat markazi” davlat unitar korxonasi direktori Ma’rufjon Muxtorov ma’lum qildi, deya xabar beradi  O‘zA.

Foto: O‘zA

— Shu kunga qadar filmlar targ‘iboti, uning reklamasi ancha og‘ir masala edi. Ko‘pincha, olinayotgan kinolar haqida aholi xabardor etilmasdi. Bu esa tomoshabinlarni qiziqishini susaytirib, kinoteatrlarga tashrifini kamayishiga sabab bo‘ldi, — deydi M.Muxtorov. — Endi bu borada yangi tizim ishlab chiqildi. Ya’ni loyihadagi 10 foiz mablag‘ kino targ‘ibotiga, uning suratga olish ishlari boshlanganidan premerasi bo‘lgunga qadar OAVda targ‘ib etilishi uchun sarflanadi.

Markazimiz joriy yilning 6-aprelida tashkil etilgan bo‘lib, O‘zbekistonda kinoprokat tizimini yaratish bilan shug‘ullanamiz. Ya’ni yagona repertuar asosida milliy kinolarni bir vaqtning o‘zida va muntazam onlayn yetkazib beramiz. Barcha kinoteatrlarni bir tarmoqqa birlashtirib, filmlarni markazlashgan holda tizimli ravishda namoyishini uyushtiramiz.

Bu qanday amalga oshiriladi? Buning uchun barcha kinoteatrlarda O‘zbekistonda ishlab chiqarilgan filmlar bir vaqtda optik aloqadan foydalangan holda onlayn tarzda ko‘rsatiladi. Misol uchun, Toshkent shahridagi Alisher Navoiy nomidagi kinoteatrda soat 11:00 da film namoyishi boshlanadigan bo‘lsa, u chekka hududdagi kinosaroyda ham boshlanadi. Shu tariqa eng chekka hududdagi aholi va yoshlarni kinomahsulotlar bilan ta’minlashga erishiladi.

Bu tizimga 2019-yilning 1-yanvaridan o‘tiladi. Shuningdek, elektron chiptalarni avtomatlashtirilgan tizimi ham joriy etiladi. Bu orqali biz qaysi filmga qancha tomoshabin kelgani, ularning qaysi mavzu va janrdagi filmlarga ehtiyoji yuqori ekanini monitoring qilish imkoniga ega bo‘lamiz.

Milliy kinolardan tashqari xalqqa manzur bo‘ladigan xorijiy filmlarni olib kelish bilan ham shug‘ullanamiz. Aytaylik, Turkiya, Koreya, Xitoy, Hindiston, Eron, Rossiya kinoijodkorlarini asarlari ko‘pchilikka ma’qul bo‘lmoqda. Hozirda ana shu davlatlarda yaratilgan yangi kinolarni xarid qilish borasida muzokaralar olib boryapmiz.