MIB energiya resurslari uchun to‘lovlar hisobidan 8 trln 771 mlrd so‘m undirdi

Joriy yil 6 oyi mobaynida Bosh prokuratura huzuridagi Majburiy ijro byurosiga yuklatilgan vazifalarning samarali bajarilishini ta’minlash maqsadida elektr va tabiiy gaz iste’molini hisobga olish uskunalaridagi ko‘rsatkichlarni ko‘rikdan o‘tkazish va elektron kuzatish imkonini beruvchi “Inspektorlar faoliyatini nazorat va tahlil qilish” dasturining veb va mobil dasturlari amaliyotga joriy etildi. Bu haqda Bosh prokuratura matbuot xizmati ma’lum qildi.

Davlat inspektorlarining kunlik ko‘rik yo‘nalishini GPS xizmati orqali xaritada belgilash, kuzatish va tizimning ma’lumotlar bazasiga kiritilgan ob’ektlarni ko‘rsatish kabi qulayliklar yaratildi. Xatlangan mol-mulklarni elektron onlayn auksionlarda realizatsiya qilish uchun “E-IJRO AUKSION” yagona elektron savdo maydonchasi yaratilib, onlayn-auksionlar o‘tkazish yo‘lga qo‘yildi.

Byuro huzuridagi “Elektron onlayn-auksionlarni tashkil etish markazi” davlat unitar korxonasida elektron raqamli imzolarni ro‘yxatdan o‘tkazish markazi tashkil etilib, davlat ro‘yxatidan o‘tkazildi. Sud va boshqa organlar hujjatlarining ijro jarayonini avtomatlashtirilgan tartibda nazorat qilish uchun “MIB Ijro” dasturi ishlab chiqildi.

Energiya resurslari uchun to‘lovlarni undirish maqsadida 1 trillion 119,1 milliard so‘m qarzi bo‘lgan 113 ming 539 yuridik shaxsning bankdagi hisob-raqamiga inkasso topshiriqnomalari qo‘yildi. Bu borada sudlarga 37 ming 522 da’vo arizalari kiritildi.

Hisob-kitoblarni o‘z vaqtida amalga oshirmagan va tarmoqqa noqonuniy ulangan 149 ming 812 iste’molchi, shu jumladan, 14 ming 403 yuridik shaxs elektr va gaz tarmoqlaridan uzildi. Energiya resurslari uchun to‘lovni undirish yuzasidan ko‘rilgan choralar natijasida 8 trillion 771 milliard so‘m undirildi.