21-iyul kuni ertalab AQShda 31 yoshli Jaklin Souza favqulodda xizmatga qo‘ng‘iroq qilib, pichoq bilan yaralangan qallig‘iga yordam kerakligini aytgan. Bu haqda “Cosmo.ru”ga tayanib, “Zakon.kz” xabar bermoqda.
Voqea joyiga yetib kelgan shifokorlar va politsiyachilar 33 yoshli Brendon Uotkinsni hushsiz holatda topgan. Uning yonida steyk kesish uchun mo‘ljallangan pichoq topilgan.
Jaklin Souza voqea sodir bo‘lgan paytda vanna qabul qilayotgani va hech nimani eshitmaganini, so‘ng esa uyga kirish eshigining ochiq holda qoldirilgani va qallig‘ining hushsiz yotganini ko‘rganini aytgan. Biroq politsiya uyga bostirib kirish bilan bog‘liq hech qanday dalil topmagan. Souza qallig‘i bilan to‘yga taklif qilinadigan mehmonlar ro‘yxatini tuzish borasida janjallashib qolgani, ehtimol u shundan keyin o‘z joniga qasd qilishga qaror qilgan bo‘lishi mumkinligini aytgan.
Keyinroq Jaklin o‘z aybiga iqror bo‘lgan. Ma’lum bo‘lishicha, qallig‘i unga ko‘plab ayollar bilan xiyonat qilgan va ulardan birini to‘yga taklif qilmoqchi bo‘lgan. Juftlik shundan keyin janjallashib qolgan va Jaklin qallig‘ini pichoqlab qo‘ygan. U Brendonning o‘limini istamaganini, hatto unga birinchi tibbiy yordam ko‘rsatishga uringanini aytgan.
Jaklin 24-iyul kuni 50 ming dollar garov evaziga qo‘yib yuborilgan. Ish bo‘yicha sudning birinchi majlisi 1-avgust kuni bo‘lib o‘tadi.
Izoh (0)