Jinoyat ishlari bo‘yicha Samarqand tuman sudi sudyasi D.Nuraliyev raisligida bo‘lib o‘tgan sudda “Zaxlik” MFY kotibi M.Namozovning jinoiy harakatlari ko‘rib chiqildi, deb xabar beradi “Daryo” muxbiri Farhod Norbo‘tayev.
Samarqand tuman “Zaxlik” MFY kotibi M.Namozov shu mahallada yashovchi fuqaro D.Kulbayevaga bola parvarishi uchun mahalla fuqarolar yig‘ini maxsus komissiyasining 2018-yil 27-fevraldagi oilaning moddiy va mulkiy holatini o‘rganish dalolatnomasiga asosan unga bola parvarishi uchun 2018-yilning 3-8-oylarida moddiy yordam tayinlanganligini bilgan holda, ushbu tayinlangan nafaqa pulining bir oyligi ya’ni, 137 ming so‘m pullarini D.Kulbayevadan tamagirlik yo‘li bilan talab qilib kelgan.
Joriy yilning 16-aprel kuni mahalla kotibi M.Namozov D.Kulbayevadan talab qilgan pullarning 50 ming so‘mni olgan. Oradan bir oz vaqt o‘tganidan so‘ng, mahalla kotibi qolgan 87 ming so‘m pul mablag‘larini berishni talab qilib kelgan.
Ikki nafar farzandning onasi, jabrlanuvchi D.Kulbayeva turmush o‘rtog‘ining velosipeddan yiqilib, tos suyaklarini sindirib olganligi bois oilasida ishlaydigan boquvchi yo‘qligi uchun pulni to‘lashga imkoni bo‘lmagan. Shu sababli huquqni muhofaza qiluvchi tashkilot vakillariga murojaat qilgan.
2018-yil 18-aprel kuni huquqni muhofaza qiluvchi organlar hamkorligida o‘tkazilgan tezkor tadbirda, Samarqand tuman “Zaxlik” mahalla fuqarolar yig‘ini ma’muriy binosida, fuqaro D.Kulbayevadan bola parvarishi nafaqasi chiqarilganligi yuzasidan qolgan 87 ming so‘m pul mablag‘larini M.Namozov ta’magirlik yo‘li bilan olayotgan vaqtda, tezkor guruh tomonidan ushlangan.
Sud davomida guvohlar va jabrlanuvchilarning fikrlari to‘liq tinglanib, voqea tafsilotlari atroflicha o‘rganilib sudning hukmi e’lon qilindi.
Sud hukmiga ko‘ra, Ma’mur Namozov O‘zbekiston Respublikasi Jinoyat Kodeksining 214-moddasi 2-qismi “b” bandi bilan, 45-moddasini qo‘llab, 2 yil mahalla fuqarolari yig‘inida ishlash huquqidan mahrum qilinib, 2 yil ozodlikni cheklash jazosi tayinlandi. O‘zbekiston Respublikasi Jinoyat Kodeksining 61-moddasi tartibida tayinlangan jazolar alohida-alohida ijro etilishi belgilandi.
Izoh (0)