Markaziy bank boshqaruvi qaroriga asosan, bank kafolatini olish tartibi soddalashtirildi. Qaror matni qonun hujjatlari ma’lumotlari milliy bazasida e’lon qilindi, deb yozmoqda Spot.
Qarorga asosan, tijorat banklari tomonidan bank kafolatini berishning amaldagi tartibiga o‘zgartirishlar kiritildi.
Mijoz bankka kreditor oldidagi majburiyatlari bajarilishining ta’minoti sifatida kafolat berish to‘g‘risida ariza bilan murojaat qilishi mumkin. O‘z navbatida bank kreditor pul summasini to‘lash haqida yozma talabnoma taqdim etsa, pulni unga to‘lash majburiyatini zimmasiga oladi.
Amaldagi tartibga kiritilgan quyidagi o‘zgartirishlarga ko‘ra, bankdan kafolat olish jarayoni soddalashtirildi:
- Kafolat olish uchun prinsipial bir qator talablarga javob berishi kerak. Xususan, prinsipial oxirgi moliyaviy uch yil natijalari bo‘yicha ijobiy auditorlik xulosasiga ega bo‘lishi lozim edi. Endilikda bu muddat 3 yildan 1 yilga qisqartirildi.
- Kafolat summasi “90993 — Kafolat va kafilliklar” hisob varag‘iga kirim qilinadi va kafolat summasi to‘liq qoplab berilgunga qadar saqlanadi. Xorijiy va xalqaro tashkilotlarning kredit liniyalari va qarzlarini jalb qilish bilan bog‘liq bank kafolatlari summasi mijozlar tomonidan grafikka asosan yoki muddatidan oldin qaytarilganda hisob varag‘ining qoldig‘i kamaytirib boriladi.
- Kafolat summasining 1 foizidan 100 foizigacha miqdorda ehtimoliy yo‘qotishlarga qarshi zaxira shakllantirish tartibi bekor qilinadi.
Izoh (0)