Toshkent shahrini ko‘rkam megapolislaridan biriga aylantirish borasidagi harakatlar davom etmoqda. 14-iyul kuni ham ana shunday mehnatlarning samarasi bo‘lgan Oasis akvaparkining ochilish marosimi bo‘lib o‘tdi. Bu haqda shahar hokimligi matbuot xizmati ma’lum qildi.
Akvapark Toshkent viloyati shifoxonasi hamda Green City turar joy kompleksi o‘rtasida joylashgan (metroning “Novza” va “Mirzo Ulug‘bek” bekatlari oralig‘ida).
Toshkent shahar hokimligi va Madaniyat vazirligi Oasis ta’sischilari hisoblanadi. Bunyodkorlik ishlari esa Respectable united service mas’uliyati cheklangan jamiyati tomonidan olib borildi. Mazkur bog‘da atrofda salqinlikni ta’minlovchi go‘zal favvoralar bunyod etilgan bo‘lib, 2 ming kvadrat metrni tashkil qiladigan to‘lqinli yirik basseyn hamda 235 metrni tashkil qiladigan harakatlanuvchi to‘lqinli ariq ham o‘rin olgan.
Oasis bog‘i bir vaqtning o‘zida 2 ming kishini qabul qilish imkoniyatiga ega. Shuningdek, hududida yuvinish xonasi, zamonaviy kiyinish xonasi, bolalar uchun va oilaviy basseyn, fudkort, katta chelakdan iborat ajoyib dush o‘rin egallagan. Suv sporti bilan shug‘ullanuvchilar uchun ham imkoniyat va sharoitlar yetarli. Suv havzalarining har biri eng zamonaviy filtrlar bilan jihozlangan.
Izoh (0)