Qozog‘istonning Turkiston viloyatida Xoja Ahmad Yassaviy ziyoratgohidan baland bo‘lmagan o‘rta asrlar uslubiga xos turar joylar qurilishi rejalashtirilmoqda. Bu haqda ushbu viloyat hokimligi matbuot xizmati ma’lum qildi, deya xabar beradi “Xalq so‘zi”.
“Turkistondagi uylar ko‘p qavatli bo‘lmaydi. Sababi ularning balandligi Xoja Ahror Yassaviy ziyoratgohidan oshib ketmasligi kerak. Muqaddas qadamjo har tomondan ko‘rinib turishi kerak. Xonadonlar o‘rta asr me’morchiligi uslubida barpo etiladi. Mamlakatda juda bo‘lmasa bitta viloyat tarixiy ko‘rinish kasb etsin”, — dedi Turkiston viloyati hokimi Janseit Tuymebayev.
Hudud rahbari bu yerda turistlar uchun qulay sharoitlar yaratish lozimligi, yangi aeroport, temir yo‘l vokzali, avtovokzal, mehmonxona va kafe qurilishi haqida ma’lum qildi. O‘z navbatida, viloyatda buyuk avliyo va mutafakkir merosiga bag‘ishlangan muzey bunyod qilinadi.
“Prezident topshirig‘i doirasida har bir mintaqa Turkistonda bittadan inshoot qurib beradi. Masalan, Ostona hokimi Aset Isekeshov Turkistonda ‘Ostona’ bog‘ini barpo etishni taklif qildi”, — dedi u.
Bundan oldin ushbu viloyat hokimi Turkiston Samarqand, Buxoro, Xiva singari sayyohlik markazlaridan biriga aylanishi kerakligini bildirgandi.
Eslatib o‘tamiz, joriy yili Qozog‘istonda Chimkent respublika maqomidagi shaharga, Turkiston esa shu nomli viloyat (avvalgi Janubiy Qozog‘iston viloyati) markaziga aylantirildi.
Izoh (0)