Bugun JCh—2018 finali: Fransiya—Xorvatiya

Bugun, 15-iyul sanasida futbol bo‘yicha Rossiya maydonlarida 1 oydan beri davom etayotgan 2018-yilgi Jahon Chempionatining final bahsi o‘tkaziladi.

Final uchrashuvida Jahon chempionligi uchun Fransiya hamda Xorvatiya terma jamoalari kurash olib boradi. Bellashuv  Toshkent vaqti bilan 20:00 da boshlanadi. Uchrashuvga Moskvadagi “Lujniki” stadioni mezbonlik qiladi.

Uchrashuvni argentinalik Nestor Pitana boshchiligidagi hakamlar boshqarib boradi.

Unga qanotlarda hamyurtlari Ernan Maydana hamda Xuan Belatti yordam beradi. Shuningdek, niderlandiyalik Byorn Kuypers to‘rtinchi hakam, Ervin Zeinstra esa uchrashuv zaxira hakami assistenti etib tayinlangan.

Mazkur o‘yin Pitana uchun JCh—2018 dagi beshinchisi bo‘lsa, mundiallar tarixidagi umumiy to‘qqizinchi bellashuviga aylanadi. Ma’lumot uchun o‘zbekistonlik FIFA referisi Ravshan Ermatov hisobida esa 11 ta uchrashuv bor. U bu borada mutlaq rekordchi hisoblanadi.