Eron hukumati qo‘shni mamlakatlar, xususan, Iroqqa ham elektr energiya eksport qilishni to‘xtatish haqida qaror qabul qildi. “TASS” axborotiga ko‘ra, bu haqda Eron energetika vaziri Rizo Ardoqoniyon ma’lum qilgan.
“Biz Iroq, Pokiston va Afg‘onistonga suv va elektr energiya yetkazib berishni nol darajagacha qisqartirdik”, — dedi u. Vazirning qayd etishicha, ushbu qaror Eronda kuzatilayotgan energetik va suv inqirozi sabab qabul qilingan.
Mintaqaviy ekspertlarning fikricha, Eronning ushbu qarori Iroqning janubiy viloyatlaridagi vaziyatning keskinlashuviga sabab bo‘lishi mumkin. U yerda bir necha kunlardan beri jazirama vaqtidagi elektr ta’minotidagi uzilishlarga qarshi norozilik namoyishlari bo‘lib o‘tmoqda.
Basrada boshlangan tinch namoyishlar ko‘p o‘tmay Iroqning barcha janubiy viloyatlari — Di-Kar, Maysan, An-Najaf, Karbalo, Bobilni qamrab olgan.
Iroq hukumati kuch tuzilmalarini jangovar shay holatga keltirib qo‘ygan bo‘lib, tinch namoyishlardan o‘zining buzg‘unchi maqsadlarida foydalanmoqchi bo‘lganlarga qat’iy choralar ko‘rishi haqida ogohlantirgan. Janubiy viloyatlardagi inqirozni hal qilish ustida maxsus idoralararo qo‘mita ishlamoqda.
Izoh (0)