O‘zAda jurnalist Jamshid Yorbekovning hududlarda bug‘doy dalalalari, hosil yig‘ishtirib olingach yoqib yuborilayotgani haqidagi maqolasi chop etildi. Quyida maqola to‘lig‘icha e’tiboringizga havola etiladi.
Jizzax viloyati Mirzacho‘l tumanidagi “Samad” fermer xo‘jaligining g‘allasi o‘rilgan 14 gektar maydoniga o‘t qo‘yib yuborildi.
Fermer xo‘jaligi rahbari Mansur Xolbekov bilan telefon orqali bog‘lanib, bu haqda so‘raganimizda aniq va to‘liq javob ololmadik.
Hosili yig‘ishtirib olingan maydonlardagi somonni yoqib yuborish hududdagi boshqa xo‘jaliklarda ham sodir etilgan.
Bunday ayanchli manzarani “Jenes”, “Laziz-Azizbek”, “Sangzor chamani” va boshqa fermer xo‘jaliklar dalalarida ham ko‘rish mumkin.
“Qahramon Rasul ota” fermer xo‘jaligi dalasida o‘zini “cho‘ponman” deb tanishtirgan mana bu yigitni raisning topshirig‘i bilan dalaga o‘t qo‘yayotgan paytda o‘t o‘chirish bo‘limiga xabar qildik. Natijada yong‘in bartaraf etildi.
“Mavsum boshida barcha fermer xo‘jaliklari rahbarlari bo‘sh qolgan maydonlarni yondirmaslik to‘g‘risida ogohlantirilgan va bu haqda arizalar ham olingan. Shunga qaramasdan, hududda 8 marta g‘allasi o‘rilgan maydonga o‘t qo‘yish holati kuzatildi. Ushbu holatlar bo‘yicha chora ko‘rish uchun tuman tabiatni muhofaza qilish inspeksiyasiga xabarnoma jo‘natilgan”, — deydi tuman yong‘in xavfsizligi bo‘limi boshlig‘i Akrom Samiyev.
Tuman tabiatni muhofaza qilish inspeksiyasi boshlig‘i Rahmatilla Asqarov bu masalada hech qanday chora ko‘rmagani, chunki hududni aylanib chiqish uchun ulovi yo‘qligini bildirdi. Mamlakatda yer unumdorligini oshirishga alohida e’tibor qaratilayotgan bir paytda tumanda bu ahvolga e’tibor berilmayotgani ajablanarli. Bunga tuman rahbarlari, soha mutasaddilari nima der ekan?
Izoh (0)