O‘zbekistonda sobiq Ichki ishlar vazirining “Profilaktika inspektori — xalq xizmatchisi” nomli kitobi chop etildi

Ichki ishlar vazir­li­gi akademiyasi boshlig‘i, general-leytenant Bahodir Matlyubovning “Profilaktika inspektori — xalq xizmatchisi” kitobi nashrdan chiqdi. Bu haqda “Xalq so‘zi” xabar bermoqda.

General-leytenant Bahodir Matlyubovning huquqni muhofaza qilish organlarida uzoq yillar davomida to‘plagan tajribasi asosida tayyorlangan ushbu kitobda yaqin tarix, ya’ni istiqlolning dastlabki yillarida tinchlik va barqarorlikni izdan chiqarishga bo‘lgan urinishlar oqibatlari bayon etiladi.

Bevaqt halok bo‘lgan yurtdoshlar, xizmat vazifasini o‘tash chog‘ida vafot etgan huquq-tartibot organlari xodimlari xotirasi yodga olinadi. O‘z navbatida, olib borilayotgan keng ko‘lamli islohotlar natijasida huquqbuzar­lik­lar, ayniqsa, uning eng xavfli ko‘rinishi bo‘lgan jinoyatchilik yildan-yilga kamayib borayotganini aniq raqamlar asosida tahlil qiladi.

— Mazkur tadqiqotlar shuni ko‘rsatmoqdaki, bugungi kun­da profilaktika inspektorlarining aksariyat qismi nafaqat faoliyatiga oid normativ-huquqiy hujjatlar mazmun-mohiyatini bilmaydi, hatto ularning mavjudligi haqida tasavvurga ham ega emas. Bu holat profilaktika inspektorlarining atigi o‘n bir foizi yuridik ma’lumotga egaligi, bunday ma’lumotga ega bo‘lmagan­lari esa maxsus tayyorgarlikdan o‘tmagani bilan izohlanadi. Ularning huquqiy bilimi, ongi va madaniyatini yuksaltirishga qaratilgan chora-tadbirlarni muvofiqlashtirish ham zamon talabiga mos emasligi qo‘llanmada ko‘rsatib o‘tilgan, — deydi Akademiya xodimi, leytenant Jamshid Xolov.