Nukusda “108-burilish” nomli abstrakt uslubdagi rasmlar ko‘rgazmasi boshlandi

O‘zbekiston Badiiy akademiyasi Qoraqalpog‘iston bo‘limi ko‘rgazmalar saroyida taniqli va yosh iqtidorli rassomlar asarlaridan tashkil topgan “108 - burilish” deb nomlangan ko‘rgazma ochildi. Bu haqda O‘zA xabar bermoqda.

“Ko‘rgazmaning bunday nomlanishiga sabab, ko‘rgazmadan o‘rin olgan asarlarning ko‘pchiligi abstrakt o‘ylash shaklida ishlangan, rassomlarning ijodidagi burilish esa insonni teran fikrlashga chorlaydi, — deydi ko‘rgazma tashkilotchisi, rassom Baxtiyor Serekeyev. — Yana bir sababi esa ko‘rgazma saroyimiz Nukusdagi xalq ta’biri bilan aytiladigan ‘108-burilish’ga yaqin joyda joylashgan”.

Ko‘rgazmaning asosiy maqsadi milliy rassomlik san’atining boy merosini va zamonaviy rassomlik san’atining yutuqlarini keng ommaga tanitish va yosh iqtidor egalarini qo‘llab-quvvatlashdir.

Shuningdek, ko‘rgazmadan joy olgan kartinalar taniqli rassomlar ijodining yangi qirralarini ochib beradi va debyutant ijodkorlarning ilk qadamlaridan xabardor qiladi.

Ko‘rgazma bir oy davom etadi.