Tojikiston bojxonasi O‘zbekiston tovarlarini olib kirish va olib chiqishga nisbatan qat’iy cheklovlarni joriy qildi. Bu haqda “Axbor”ga tayanib, “Kommersant.uz” xabar berdi.
Xususan, bir kishining 2 kilogramm go‘sht, 5 kilogramm non va 7 kilogramm guruch olib kirishiga ruxsat berilgan. Yukning umumiy og‘irligi 40 kilogrammdan oshmasligi kerak.
Chegara ochilishining ilk kunlarida eksport va importga nisbatan hech qanday cheklov joriy qilinmagan edi.
“Chegarani kesib o‘tayotganimizda bir dona tovuq tuxumini ham olib o‘tmaslik haqida bizni ogohlantirishdi. Aks holda yuk ortga qaytarib yuborilishini aytishdi. Shuningdek, yukning umumiy og‘irligi 40 kilogrammdan ortmasligi kerakligi ham aytildi. Shu bilan birgalikda, bir mahsulotning 10 kilogrammdan ko‘p bo‘lmasligi tayinlandi”, — deya Paxtaobod punkti orqali chegarani kesib o‘tgan Tojikistonlik tadbirkor ma’lum qilgan.
Tojikiston fuqarolarining aytishicha, chegarani kesib o‘tish punktlarida bu talablarga qat’iy amal qilinmoqda.
Panjikentlik fuqaro O‘zbekistonga tez-tez qatnashi, bir oy ilgari qo‘shni mamlakatdan katta hajmda mahsulot kelib turgani va mahalliy bozorlarda sotilganini aytgan. “O‘zbekistonlik savdogarlar kolbasa, shakar va shirinliklarni mashinalarga ortib olib kelishar va mahalliy aholiga sotishar edi”, — deydi panjikentlik fuqaro.
Tojikiston bojxona xizmati O‘zbekiston import mahsulotlarini olib keluvchi tadbirkorlarni tovuq tuxumini olib kelmaslik haqida qat’iy ogohlantirgan. Aks holda yuk ortiga qaytarib yuborilishi aytilgan.
O‘zbekistondan Tojikistonga tovuq tuxumlarini import qilish 2018-yilning iyunida taqiqlangan edi. Ushbu taqiq Tojikistonda tuxum narxining deyarli 2 barobar ortishiga olib kelgan.
Izoh (0)