Pokistonda suvdan qo‘rqadigan yigit o‘z qo‘rquvini yengmoqchi bo‘lib, cho‘kib ketdi

Pokistonning Karachi shahrida yashovchi talaba yigit suvdan qo‘rqmasligini ko‘rsatib qo‘ymoqchi bo‘ldi va to‘lqinli oqimga yiqilib, cho‘kib ketdi. Bu haqda Daily Mail xabar bermoqda.

19 yoshli Sheroz Xon Svat daryosi bo‘yida tog‘asi va uning o‘g‘li bilan dam olgan. Butun sayohat davomida u suvdan uzoq yurgan va buning uchun tog‘avachchasi uni masxara qilgan.

Mehmonxonani tark etib, uyga otlangan paytlarida Sheroz suvdan qo‘rqmasligini ko‘rsatib qo‘ymoqchi bo‘lgan. Tog‘avachchasidan uni videoga olishni so‘ragan, o‘zi esa daryo qirg‘og‘ining eng chetiga ketgan, ammo silliq tosh ustida sirpanib ketib, suvga yiqilgan. Tezkor oqim uni shu zahoti olib ketgan.

Mehmonxona to‘lovlarini to‘layotgan tog‘asi o‘g‘lining baqiriqlarini eshitib, yordamga shoshilgan, ammo na u, na qirg‘oqdagi boshqa odamlar Sherozga yordam bera olgan: suv qattiq to‘lqinlanib oqqan. O‘n daqiqadan keyin qutqaruvchilar yetib kelganida, yigit allaqachon cho‘kib ketgan.